सावंतवाडी,दि.०५: कौशल्य विकास, रोजगार, उद्योजकता व नाविन्यता विभागाच्या जिल्हास्तरीय रोजगार मेळावा समन्वय समितीवर अमोल टेंबकर यांची सदस्य म्हणून निवड करण्यात आली आहे. समितीची पहिली बैठक आज ओरोस येथे जिल्हा कौशल्य विकास व रोजगार उद्योजकता मार्गदर्शन केंद्र कार्यालयात पार पडली. यावेळी सहाय्यक आयुक्त भैय्याजी येरमे यांच्या हस्ते नवनिर्वाचित सदस्यांचे अभिनंदन करण्यात आले.
कौशल्य विकास, रोजगार व उद्योजकता आयुक्तालयाच्या आदेशानुसार जिल्हा कौशल्य विकास, रोजगार व उद्योजकता मार्गदर्शन केंद्र, सिंधुदुर्ग यांनी समितीच्या सदस्यांना निवडीबाबतचे पत्र जारी केले आहे. या समितीमध्ये समन्वयक तथा अध्यक्ष म्हणून गीता काळे यांची नियुक्ती करण्यात आली असून सदस्य म्हणून अमोल टेंबकर, अमित नाईक, सुरज सावंत, अण्णा लुडबे आणि अवधूत देवधर यांचा समावेश आहे. राज्य व विभागस्तरावरील शासन निर्णयांच्या अनुषंगाने स्थापन करण्यात आलेली ही समिती जिल्ह्यातील रोजगार मेळाव्यांचे प्रभावी नियोजन, समन्वय आणि अंमलबजावणीसाठी कार्य करणार आहे.
