सावंतवाडी, दि.०५: सार्वजनिक बांधकाम विभाग, सावंतवाडी येथे सहाय्यक अभियंता श्रेणी-२ म्हणून अत्यंत जबाबदारीने सेवा बजावणारे प्रमोद लोहार यांची पदोन्नतीने मुंबई येथे उपविभागीय अभियंता (डेप्युटी इंजिनिअर) या महत्त्वाच्या पदावर नियुक्ती झाली आहे. त्यांच्या कार्यक्षम आणि उल्लेखनीय सेवेची दखल घेत देण्यात आलेली ही पदोन्नती त्यांच्या कारकिर्दीतील एक महत्त्वपूर्ण टप्पा मानली जात असून, या निवडीमुळे त्यांच्या सहकाऱ्यांसह सर्वस्तरातून त्यांच्यावर अभिनंदनाचा वर्षाव होत आहे.
मूळचे ३२ शिराळा (जि. सांगली) येथील रहिवासी असलेले प्रमोद लोहार यांनी सार्वजनिक बांधकाम विभागात आपल्या सेवाकाळात कामाप्रती निष्ठा, जबाबदारी आणि कार्यतत्परता जपली आहे. सावंतवाडीत सहाय्यक अभियंता म्हणून कार्यरत असताना सार्वजनिक बांधकामाशी संबंधित अनेक नागरी व प्रशासकीय कामांमध्ये त्यांनी मोलाची आणि महत्त्वपूर्ण भूमिका बजावली. शासकीय सेवेत प्रामाणिकपणा, कामातील सातत्य आणि कर्तव्यदक्षतेच्या जोरावर त्यांनी आपल्या कामाची एक वेगळी छाप निर्माण केली होती.
सावंतवाडीसारख्या निसर्गरम्य आणि महत्त्वाच्या उपविभागातून थेट राज्याची राजधानी असलेल्या मुंबईत उपविभागीय अभियंतासारख्या जबाबदार पदावर झालेली ही पदोन्नती लोहार यांच्या उत्कृष्ट सेवेची पावती मानली जात आहे. मुंबईतील या नव्या पदाच्या माध्यमातून ते आपल्या कार्यकौशल्याच्या जोरावर अधिक उत्तम आणि उल्लेखनीय कामगिरी बजावतील, असा विश्वास व्यक्त केला जात आहे. त्यांच्या या यशाबद्दल सार्वजनिक बांधकाम विभागातील अधिकारी-कर्मचारी, त्यांचे सहकारी, मित्रपरिवार आणि हितचिंतकांनी त्यांचे मनःपूर्वक अभिनंदन करत पुढील वाटचालीसाठी उदंड शुभेच्छा दिल्या आहेत.
