विद्यार्थी अन् शिक्षकांच्या सुमधुर अभंगगायनाने जिंकली उपस्थितांची मने; वारकरी दिंडी व नृत्याने भरली रंगत
दोडामार्ग, दि.२८: शिक्षण प्रसारक मंडळ, सावंतवाडी संचलित दोडामार्ग इंग्लिश स्कूल व ज्युनिअर कॉलेज, दोडामार्ग येथे आषाढी एकादशीच्या पावन मुहूर्तावर ‘अभंगवाणी’ या विशेष भक्तिमय सांस्कृतिक कार्यक्रमाचे थाटात आयोजन करण्यात आले होते. टाळ-मृदंगाचा गजर, विठ्ठलनामाचा जयघोष आणि वारकरी वेशभूषेतील विद्यार्थ्यांच्या उत्साहामुळे संपूर्ण शाळा परिसर भक्तीच्या रसात न्हाऊन निघाला होता.
कार्यक्रमाचा प्रारंभ अतिशय नयनरम्य अशा वारकरी दिंडीने झाला. पारंपरिक पोशाखात सज्ज झालेल्या इयत्ता पाचवी ते दहावीच्या विद्यार्थ्यांनी दिंडीच्या माध्यमातून वारकरी संस्कृतीचे मनमोहक दर्शन घडविले. दिंडीनंतर विद्यार्थ्यांनी संत ज्ञानेश्वर, संत तुकाराम आदी विविध संतांचे लोकप्रिय अभंग सादर केले. याशिवाय विद्यार्थ्यांनी सादर केलेल्या उत्कृष्ट वारकरी नृत्याने उपस्थितांची वाहवा मिळवली.
विद्यार्थ्यांच्या सादरीकरणासोबतच शाळेतील शिक्षक आनंद बामणीकर, तुळशीदास राऊळ आणि कु. वैष्णवी कदम यांनी भावपूर्ण अभंग सादर करत कार्यक्रमात रंगत आणली. या भक्तिमय गायनाला कु. दक्षता बाबुराव घोगळे व कु. स्वानंदी महेंद्र मणेरीकर यांनी हार्मोनियमची सुरेल साथ दिली. तर कार्तिक अभंग व ओम गवस यांनी तबल्यावर आणि गणेश ताटे यांनी पखवाजावर दिलेली लयबद्ध साथसंगत लक्षवेधी ठरली. संपूर्ण कार्यक्रमाचे सूत्रसंचालन शिक्षक तुळशीदास राऊळ यांनी आपल्या प्रभावी शैलीत केले.
या उपक्रमामुळे विद्यार्थ्यांना भारतीय अध्यात्म, संतपरंपरा आणि वारकरी संस्कृतीचे प्रत्यक्ष दर्शन घडले असून, त्यांच्यात सांस्कृतिक मूल्ये व संस्कार रुजण्यास मदत झाली आहे. या यशस्वी आणि भावपूर्ण आयोजनाबद्दल शिक्षण प्रसारक मंडळ सावंतवाडीचे अध्यक्ष श्री. विक्रांत विकासभाई सावंत, सर्व संचालक मंडळ, शिक्षक, विद्यार्थी आणि पालकांनी कलाकारांचे व आयोजकांचे भरभरून कौतुक केले.
