गवळी तिठा येथील घटनेनंतर पोलिसांची चक्रावली सूत्रे; हजेरी बुक आणि कॉल हिस्ट्रीचा अचूक माग काढत बेळगावच्या नातेवाईकांशी साधला संपर्क.
सावंतवाडी, दि.२६: शहरातील गजबजलेल्या गवळी तिठा परिसरात गुरुवारी एका अनोळखी व्यक्तीचा मृतदेह आढळून आल्याने परिसरात प्रचंड खळबळ उडाली आहे. मात्र, सावंतवाडी पोलीस ठाण्याचे पोलीस उपनिरीक्षक (PSI) प्रमोद पाटील आणि त्यांच्या सहकाऱ्यांच्या तत्परतेमुळे अवघ्या ४ तासांत या मृत व्यक्तीची ओळख पटवण्यात यश आले आहे. राजू रामा जामदार (रा. हेरा, ता. चंदगड, जि. बेळगाव, कर्नाटक) असे मयत व्यक्तीचे नाव असून, त्यांचा मृत्यू हृदयविकाराच्या झटक्याने झाला असावा, असा प्राथमिक अंदाज व्यक्त करण्यात येत आहे.
मिळालेल्या माहितीनुसार, गवळी तिठा परिसरात एक व्यक्ती संशयास्पद स्थितीत पडली असल्याचे स्थानिक नागरिकांच्या निदर्शनास आले. नागरिकांनी जवळ जाऊन पाहिले असता ती व्यक्ती मृत असल्याचे समजले. स्थानिकांनी तात्काळ सावंतवाडी पोलीस ठाण्याशी संपर्क साधून घटनेची माहिती दिली. माहिती मिळताच पोलीस पथक घटनास्थळी दाखल झाले. पोलिसांनी घटनेचा पंचनामा करून मृतदेह ताब्यात घेतला आणि तो उत्तरीय तपासणीसाठी उपजिल्हा रुग्णालयात पाठवला. सुरुवातीला ती व्यक्ती कोण, कुठून आली, याबाबत मोठे गूढ निर्माण झाले होते.
घटनेचे गांभीर्य ओळखून पोलीस उपनिरीक्षक प्रमोद पाटील यांनी तातडीने तपासाला सुरुवात केली. त्यांनी केवळ परिसरातील नागरिकांवर अवलंबून न राहता, संबंधित व्यक्तीच्या कामाच्या ठिकाणी जाऊन थेट हजेरी बुक तपासले आणि तिथल्या कामगारांकडे कसून चौकशी केली. या चौकशी दरम्यान समजले की, संबंधित व्यक्तीने काही वेळापूर्वीच मालकाच्या मोबाईलवरून कॉल केला होता.
PSI पाटील यांनी क्षणाचाही विलंब न लावता कॉल हिस्ट्री तपासून मयताचा मुलगा सूरज जामदार आणि पत्नी आशा जामदार (दोघे रा. बेळगाव) यांच्याशी संपर्क साधला व त्यांना घटनेची माहिती दिली. नातेवाईक सावंतवाडीत पोहोचल्यानंतर या मृतदेहाची अधिकृत ओळख निश्चित झाली.
गजबजलेल्या परिसरात मृतदेह सापडल्यानंतर शहरात विविध चर्चांना उधाण आले होते. मात्र, कोणतीही ओळख नसताना केवळ ४ तासांत कौशल्याने तपास करत नातेवाईकांचा शोध घेणारे पोलीस उपनिरीक्षक प्रमोद पाटील यांच्या या सिंघम स्टाईल कामगिरीचे व तत्परतेचे सर्वत्र कौतुक होत आहे. या प्रकरणाचा पुढील तपास सावंतवाडी पोलीस करत आहेत.
