सावंतवाडी,दि.११: शालेय जीवनातील निखळ मैत्री आणि बालपणीच्या आठवणींना उजाळा देण्यासाठी कलंबिस्त इंग्लिश स्कूलच्या १९९३-९४ बॅचमधील माजी विद्यार्थ्यांचा ‘आठवणींची शाळा’ हा स्नेहमेळावा नुकताच आंबोली येथील निसर्गरम्य परिसरात उत्साहात पार पडला. प्रतिवर्षाप्रमाणे एकत्र आलेल्या या मित्र-मैत्रिणींनी केवळ गप्पागोष्टींवर न थांबता, समाजाचे ऋण फेडण्यासाठी ‘दिशा फाउंडेशन’च्या माध्यमातून विविध सामाजिक उपक्रम राबविण्याचा महत्त्वपूर्ण संकल्प यावेळी केला.
अनेक वर्षांनंतर एकमेकांना भेटल्याचा आनंद सर्व माजी विद्यार्थ्यांच्या चेहऱ्यावर ओसंडून वाहत होता. कार्यक्रमाची सुरुवात शालेय जीवनातील आठवणींना उजाळा देऊन झाली. यावेळी उपस्थितांनी आपल्या जडणघडणीत मोलाचा वाटा उचलणाऱ्या शिक्षकांविषयी कृतज्ञता व्यक्त केली. जुन्या छायाचित्रांचे प्रदर्शन, सांस्कृतिक कार्यक्रम आणि मैत्रीपूर्ण संवादामुळे या सोहळ्याला विशेष रंगत आली. एकमेकांच्या सुख-दुःखात सहभागी होत ही मैत्री अशीच टिकवून ठेवण्याचा निर्धार सर्वांनी व्यक्त केला.
केवळ स्नेहसंमेलन न राहता या भेटीला सामाजिक कार्याची जोड देण्याचे सर्व संमतीने ठरले. ‘दिशा फाउंडेशन’च्या माध्यमातून भविष्यात गरजू विद्यार्थ्यांना शैक्षणिक मदत करणे, आर्थिकदृष्ट्या दुर्बल कुटुंबांना आधार देणे, पर्यावरण संवर्धन आणि समाजात व्यसनमुक्तीबाबत जनजागृती करणे अशा विविध क्षेत्रांत कार्य करण्याचा संकल्प यावेळी करण्यात आला. सामाजिक बांधिलकी जपण्याच्या या निर्णयाचे सर्व स्तरांतून कौतुक होत आहे.
या स्नेहमेळाव्याला सतीश सावंत, दीपक राऊळ, अनिल राऊळ, प्रवीण कुडतरकर, सुभाष कुडतकर, महेश मडगावकर, विलास राऊळ, राजू गोवेकर, विष्णू राऊळ, महेश राऊळ, संतोष राऊळ, जयद्रथ राऊळ, दीपा नाईक, जुली अल्फान्सो, कलेशा म्हाडगुत, रजनी पास्ते, संगीता गावडे-शेडगे यांच्यासह १९९३-९४ बॅचमधील अनेक माजी विद्यार्थी उपस्थित होते. आगामी काळातही असेच विधायक उपक्रम आणि स्नेहमेळावे आयोजित करण्याचा निर्णय घेऊन या संमेलनाची सांगता झाली.
