इयत्ता १० वीच्या परीक्षेत कॅडेट वेदांत महाडीक व कॅडेट पार्थ सांडव विद्यालयात प्रथम; सर्व विद्यार्थी यशस्वी
सावंतवाडी, दि.०८: आंबोली येथील सिंधुदुर्ग सैनिक स्कूल अँड ज्युनियर कॉलेजच्या विद्यार्थ्यांनी इयत्ता १० वीच्या परीक्षेत घवघवीत यश संपादन करून शाळेच्या शिरपेचात मानाचा तुरा रोवला आहे. शाळेने सलग १८ व्या वर्षी १०० टक्के निकालाची आपली देदीप्यमान परंपरा कायम राखली असून, या यशामुळे परिसरातून कौतुकाचा वर्षाव होत आहे. यावर्षी एकूण २८ विद्यार्थ्यांनी विशेष श्रेणी (Distinction) मिळवली असून, उर्वरित २२ विद्यार्थी प्रथम श्रेणीत उत्तीर्ण झाले आहेत.
या परीक्षेमध्ये कॅडेट वेदांत दीपक महाडीक आणि कॅडेट पार्थ निलेश सांडव या दोघांनीही ९४.२० टक्के गुण मिळवून विद्यालयात संयुक्तरीत्या प्रथम क्रमांक पटकावला आहे. कॅडेट जगन्मय कमलेश कांबळी याने ९४.०० टक्के गुणांसह द्वितीय क्रमांक, तर कॅडेट सतेज नाणराव पाटील याने ९२.२० टक्के गुण मिळवून तृतीय क्रमांक संपादन केला. तसेच कॅडेट ओंकार नामदेव धुरी याने ९१.०० टक्के गुण मिळवून विशेष प्राविण्य मिळवले आहे.
सिंधुदुर्ग सैनिक स्कूलचे विद्यार्थी केवळ शालेय परीक्षेतच नव्हे, तर एनडीए (NDA) लेखी परीक्षा, जेईई (JEE), सीईटी (CET) आणि नीट (NEET) यांसारख्या स्पर्धात्मक परीक्षांमध्येही सातत्याने यश मिळवत आहेत. शाळेचे अनेक माजी विद्यार्थी आज भारतीय लष्कर, नौदल, मर्चंट नेव्ही तसेच नामांकित बहुराष्ट्रीय कंपन्यांमध्ये अधिकारी म्हणून देशसेवा बजावत आहेत. शाळेत विद्यार्थ्यांना निवासी सैन्य प्रशिक्षण, कवायत, युद्ध कौशल्य, आत्मसंरक्षण आणि विविध साहसी खेळांचे मार्गदर्शन दिले जाते, ज्याचा फायदा त्यांना सर्वांगीण प्रगतीसाठी होत आहे.
शाळेने सलग १८ वर्षे १०० टक्के निकालाची परंपरा कायम राखल्याबद्दल संस्थेचे अध्यक्ष श्री. सुनील राऊळ, सचिव श्री. जॉय डॉन्टस, संचालक श्री. शंकर गावडे, श्री. शिवाजी परब, कार्यालयीन सचिव श्री. दीपक राऊळ, सैनिक स्कूलचे प्राचार्य श्री. नितीन गावडे, वर्गशिक्षक श्री. मायाप्पा शिंदे सर तसेच सर्व शिक्षक व शिक्षकेतर कर्मचारी यांनी उत्तीर्ण विद्यार्थ्यांचे अभिनंदन करून त्यांच्या पुढील वाटचालीस शुभेच्छा दिल्या आहेत.
