कुडाळ, दि.०६: “इच्छाशक्ती प्रबळ असेल तर यशाचे शिखर गाठणे कठीण नसते,” हे माणगाव येथील जिल्हा परिषद शाळा नंबर १ ची विद्यार्थिनी कु. मिताली मिलिंद धुरी हिने सिद्ध करून दाखवले आहे. अत्यंत चुरशीच्या आणि कठीण मानल्या जाणाऱ्या जवाहर नवोदय विद्यालय (सांगेली) प्रवेश परीक्षेत मितालीने ९१.२५% गुण मिळवून इयत्ता ६ वी मध्ये आपला प्रवेश निश्चित केला आहे. तिच्या या यशाने संपूर्ण परिसरातून कौतुकाचा वर्षाव होत आहे.
मितालीचे प्राथमिक शिक्षण जिल्हा परिषद शाळा नंबर १ माणगाव येथे झाले. पहिल्या इयत्तेपासूनच ती अभ्यासात आणि अवांतर शालेय उपक्रमात अत्यंत हुशार होती. जिल्हा परिषदेच्या शाळेत शिकत असताना तिने विविध स्पर्धांमध्ये नेहमीच पहिल्या तीन क्रमांकांत आपले स्थान कायम राखले होते. अभ्यासातील हेच सातत्य आणि परीक्षेसाठी घेतलेली मेहनत तिला नवोदयच्या प्रवेशापर्यंत घेऊन गेली आहे. प्रतिकूल परिस्थितीवर मात करत मिळवलेले हे यश ग्रामीण भागातील इतर विद्यार्थ्यांसाठी प्रेरणादायी ठरत आहे.
कोणत्याही यशामागे योग्य मार्गदर्शनाचा वाटा मोठा असतो. मितालीला या प्रवासात शिक्षक एकनाथ कुर्लेकर, जीयाउद्दीन खतीब आणि शिक्षिका सौ. संचिता सावंत यांचे मोलाचे मार्गदर्शन लाभले. शिक्षकांनी दिलेल्या सुयोग्य दिशादर्शन आणि मितालीची स्वतःची चिकाटी यामुळे हा ‘नवोदय’चा डोंगर पार करणे तिला शक्य झाले. आपल्या लेकीच्या या देदीप्यमान यशाबद्दल तिचे वडील, पत्रकार मिलिंद रामा धुरी आणि माता सौ. मनाली मिलिंद धुरी यांनी अतिशय आनंद व्यक्त केला असून, हे तिच्या जिद्दीचे यश असल्याचे म्हटले आहे.
मितालीच्या या यशाबद्दल माणगाव पंचक्रोशीतील ग्रामस्थ, शिक्षक वृंद आणि पत्रकारितेतील मान्यवरांकडून तिचे विशेष अभिनंदन केले जात आहे. ग्रामीण भागातील एका जिल्हा परिषद शाळेच्या विद्यार्थिनीने मिळवलेल्या या यशाचे सर्व स्तरावर तोंड भरून कौतुक होत आहे.
