सावंतवाडी,दि.२०: सिंधुदुर्ग हा स्वाभिमानी अन् कर्तृत्ववान लोकांचा जिल्हा असून, माजी राज्यमंत्री प्रवीण भोसले व निवृत्त अधिकारी तथा कीर्तनकार शेखर पाडगांवकर ही व्यक्तिमत्वे त्याचेच प्रतीक आहेत. या दोन्ही निष्कलंक आणि निरपेक्ष हेतूने कार्य करणाऱ्या व्यक्तींचा गौरव कोकण मराठी साहित्य परिषदेने केला असून, राजकारण व समाजकारणात नव्या पिढीसाठी ही व्यक्तिमत्वे आदर्श असल्याचे गौरवोद्गार कणकवलीचे नगराध्यक्ष संदेश पारकर यांनी काढले. येथील मळगाव इंग्लिश स्कूलच्या सभागृहात आयोजित दिमाखदार सोहळ्यात ‘स्व. प्रा. मिलिंद भोसले स्मृती पुरस्कार’ माजी राज्यमंत्री प्रवीण भोसले यांना, तर ‘स्व. ॲड. दीपक नेवगी स्मृती पुरस्कार’ शेखर पाडगांवकर यांना मान्यवरांच्या हस्ते प्रदान करण्यात आला. याप्रसंगी निवृत्त उपविभागीय पोलीस अधिकारी दयानंद गवस यांनी कार्यक्रमाचे अध्यक्षस्थान भूषविले.
कोमसाप शाखा सावंतवाडीच्या वतीने आयोजित या सोहळ्यात प्रवीण भोसले यांना सामाजिक, शैक्षणिक, राजकीय, साहित्य आणि कला-सांस्कृतिक क्षेत्रातील सेवेबद्दल, तर शेखर पाडगांवकर यांना सामाजिक, आध्यात्मिक, साहित्य व विधी सेवा क्षेत्रातील योगदानाबद्दल सन्मानित करण्यात आले. याच कार्यक्रमात कणकवलीचे नगराध्यक्ष संदेश पारकर आणि निवृत्त उपविभागीय अधिकारी दयानंद गवस यांचाही विशेष गौरव करण्यात आला. सत्कारला उत्तर देताना शेखर पाडगांवकर यांनी हा सोहळा ‘अद्वैत सोहळा’ असल्याचे सांगत निरपेक्ष कामाचे फळ मिळाल्याची भावना व्यक्त केली. तर माजी राज्यमंत्री प्रवीण भोसले यांनी आपल्या भावना मांडताना सांगितले की, जनतेच्या साथीने मी आमदार आणि मंत्री झालो, अनेक दिग्गजांचे मार्गदर्शन मला लाभले. मात्र, शरद पवार यांना मान्य नसतानाही कोकणचे पर्यावरण राखण्यासाठी मी काही ठाम भूमिका घेतल्या. कोकण हिताच्या या भूमिकांमुळे मी राजकीयदृष्ट्या कदाचित मागे पडलो असेन, पण त्याचे मला कोणतेही दुःख नाही.
अध्यक्षीय मनोगत व्यक्त करताना दयानंद गवस यांनी भोसले आणि पाडगांवकर यांच्या कार्याचे कौतुक करत नव्या पिढीने त्यांच्याकडून प्रेरणा घेण्याचे आवाहन केले. या सोहळ्याला ऐक्यवर्धक संघ मुंबईचे सचिव आर. आर. राऊळ, स्कूल कमिटी चेअरमन मनोहर राऊळ, कर्नल सुभाष भोसले, सौ. अनुराधा भोसले, अजय भोसले, कोमसाप जिल्हा सचिव ॲड. संतोष सावंत, सावंतवाडी अध्यक्ष दीपक पटेकर, सचिव राजू तावडे, उपाध्यक्ष अभिमन्यू लोंढे यांसह कोकण मराठी साहित्य परिषदेचे अनेक पदाधिकारी आणि सदस्य मोठ्या संख्येने उपस्थित होते. कार्यक्रमाचे प्रास्ताविक दीपक पटेकर यांनी केले, सूत्रसंचालन सहसचिव विनायक गांवस यांनी केले तर आभार सचिव राजू तावडे यांनी मानले.
