गोव्यातील पर्यटक कोकणाकडे वळविल्यास दोन्हीकडे समतोल राखला जाईल…

अ‍ॅड. रमाकांत खलप; देशात सुरू असलेले फोडाफोडीचे राजकारण लोकशाहीला घातक…

सावंतवाडी, दि.१५: गोव्यात पर्यटकांची वाढती लक्षात घेता त्याठिकाणी मोठा ताण आला आहे. त्यामुळे तेथील पर्यटकांची संख्या कोकणकडे वळविल्यास त्याचा निश्चितच फायदा होईल आणि विशेष म्हणजे पर्यटनांचा समतोल राखला जाईल, असे मत माजी केंद्रीय मंत्री अ‍ॅड. रमाकांत खलप यांनी आज येथे मांडले. देशाच्या राजकारणात सद्यस्थिती सुरू असलेली फोडाफोडी लोकशाहीला घातक आहे. मात्र यावर बोलणार कोण? असाच प्रकार सुरू राहिल्यास कठीण आहे, असेही त्यांनी सांगितले.
श्री. खलप आज याठिकाणी आले असता गोवा सरकारकडुन तेथील गाड्या सिंधुदुर्ग व कारवार येथे बाहेर नेल्यास दंड आकारण्याचा निर्णय घेतला आहे. याबाबत श्री. खलप यांना विचारले असता ते म्हणाले, सद्यस्थितीत गोव्यात पर्यटकांची मोठी गर्दी आहे. त्यामुळे स्थानिक लोकांना ती असह्य होत आहे. अनेकांनी विदेशात जाणे पसंत केले. त्यामुळे पर्यटकांची वाढती संख्या आता अन्य ठिकाणी वळविणे गरजेचे आहे. त्यासाठी कोकणकडे ही पर्यटकांची संख्या वळविल्यास गोव्यावरचा ताण कमी होईल आणि अन्य भागाचा विकास होण्यास मदत होईल.
ते पुढे म्हणाले, राजकारणात सद्यस्थितीत फोडाफोडीचे राजकारण सुरू आहे. सत्तेसाठी हा सर्व प्रकार सुरू आहे. याबाबत त्यांना विचारले असता हा प्रकार काय नवीन नाही, पण दोन तृतीयांश सदस्य गेल्यांनतर पक्षच दुसर्‍या पक्षात विलीन होतो, असा काही जो नवा पायंडा पडत आहे तो योग्य नाही. आणि हे असेच सुरू राहिल्यास लोकशाहीला घातक ठरू शकते.
यावेळी त्यांनी राहुल गांधींच्या भारत जोडो यात्रेला मोठ्या प्रमाणात प्रतिसाद मिळत असल्याचा दावा केला. येणार्‍या निवडणूकीत फायदा होणार की नाही, असे विचारले असता आपण आत्ताच काही सांगू शकत नसल्याचे ते म्हणाले. उचनिच वाद संपला पाहिजे. सर्वांना जगता आले पाहिजे यासाठी धोरण ठरविले गेले पाहिजे. मात्र दुर्दैवाने आपले विचार आजही मागासलेले आहेत, अशी त्यांनी खंत व्यक्त केली.