मळगाव घाटीत कचरा टाकणाऱ्यांवर आता सोलार कॅमेऱ्याची नजर :

मळगाव संयुक्त व्यवस्थापन समितीच्या बैठकीत नियोजन :-कचरा फेकणाऱ्यावर कारवाई करणार : सरपंच स्नेहल जामदार

सावंतवाडी.दि.१३ : येथील मार्गावरील मळगाव घाटीत कचरा टाकणाऱ्यांची संख्या दिवसेंदिवस वाढत चालली आहे त्यामुळे त्यावर नियंत्रण मिळविण्यासाठी मळगाव संयुक्त वन व्यवस्थापन समितीने ठोस उपाययोजना आखली असून येत्या काही दिवसात सोलार सीसीकॅमेरे बसविण्यात येणार असून कचरा फेकणाऱ्यावर कडक कारवाई केली जाणार आहे.
निसर्ग संपन्न मळगाव घाटीत सद्या : अक्षरश कचऱ्याचे साम्राज्य पसरलेले दिसत आहे. सावंतवाडी शहर तसेच ग्रामीण भागातूनही येजा करणारे वाहन चालक घाटीत कचरा फेकून निघून जातात. यात नेहमीच्या कचऱ्याबरोबर फुटलेल्या काचा लाकडाचे तुकडे खिळे अशा धारदार वस्तु फेकल्या जातात. त्याचप्रमाणे शिल्लक राहिलेले दुषित अन्नपदार्थ प्लास्टीक पिशव्यात भरुन घाटात टाकले जातात.
यावर नियंत्रण मिळविण्यासाठी आता मळगाव संयुक्त वन व्यवस्थापन समिती पुढे सरसावली असून लवकरच याठिकाणी वन विभागाच्या सहकार्याने सोलार सीसीकॅमेरे बसविण्यात येणार आहेत या कॅमेरात चालत्या गाडीवरुन कचऱ्याच्या पिशव्या फेकणाऱ्या वाहनांना नंबर कैद झाल्यावर त्या नंबरच्या आधारे संबंधीतांवर कायदेशीर कारवाई करण्यात येईल. त्याचप्रमाणे संबंधीत व्यक्तीकडून संपूर्ण परिसराची साफसफाई करुन घेतली जाईल.
आपला जिल्हा पर्यटन जिल्हा असून नैसर्गिक संपत्तीचे रक्षण करणे जिल्ह्याचे नागरिक म्हणून आपली प्रत्येकाची जबाबदारी असते. परंतु सामाजिक बांधिलकी विसरुन स्वत : च्या घरातील कचरा सौंदर्याने नटलेल्या निसर्गाच्या ठिकाणी टाकूण परिसर विदृप करण्याचे काम काही समाजकंटकांकडून होताना दिसत आहे. या समस्येवर वन समितीच्या बैठकीमध्ये सदस्य गजानन सातार्डेकर यांनी गांभिर्याने लक्ष वेधले. तसेच यावर तातडीने कार्यवाही होण्यासंदर्भात प्रयत्न करण्यात येणार आहेत. अशी माहितीच्या अध्यक्षा तथा सरपंच स्नेहल जामदार यांनी दिली. यावेळी उपसरपंच हनुमंत पेडणेकर,सदस्य गजानन सातार्डेकर, गुरुनाथ गावंकर, अशोक बुगडे, वन अधिकारी व कर्मचारी श्री राणे, नानगिरे वाघमारे, आदी उपस्थित होते. मळगाव घाटीत गेल्या दोन चार दिवसात कचरा टाकताना पकडलेल्यांकडून टाकलेल्या कचऱ्यासोबत आजूबाजूची पण साफसफाई करून घेतली आहे. त्यामुळे भविष्यात कचरा फेकणाऱ्यांवर कडक कारवाई करण्याचे धोरण समितीने आखले असून हे प्रकार थांबतील असा विश्वास समितीने व्यक्त केला आहे. त्याच बरोबर घरातील कचरा मळगाव घाटीत फेकणाऱ्यांना हे प्रकार थांबवावेत, असे आवाहन समिती अध्यक्षा स्नेहल जामदार यांनी केले आहे.