सिंधुदुर्गातील स्पर्धा परीक्षा चळवळीला नवे बळ; अद्ययावत सुविधांनी सज्ज भव्य वास्तू विद्यार्थ्यांच्या सेवेत
ओरोस, दि.२५: गेली १४ वर्षे सिंधुदुर्ग जिल्ह्यात स्पर्धा परीक्षांची व्यापक चळवळ यशस्वीपणे राबवणाऱ्या ‘गुरुकुल अकॅडमी’च्या स्वमालकीच्या नूतन वास्तूचा उद्घाटन सोहळा नुकताच ओरोस येथे मोठ्या उत्साहात आणि भावूक वातावरणात पार पडला. “परिस्थितीला दोष न देता, मेहनतीला सातत्याची जोड द्या आणि ध्येय गाठेपर्यंत थांबू नका,” असा प्रेरणादायी कानमंत्र या प्रसंगी प्रमुख वक्ते आणि सामाजिक कार्यकर्ते दयानंद कुबल यांनी उपस्थित युवकांना दिला.
गुरुकुल अकॅडमीने गेल्या १४ वर्षांच्या प्रवासात जिल्ह्यातील शेकडो विद्यार्थ्यांना दर्जेदार मार्गदर्शन करून पोलीस दल व विविध प्रशासकीय सेवांमध्ये घडवले आहे. ग्रामीण भागातील विद्यार्थ्यांना अधिकारी बनवण्याचे स्वप्न दाखवणाऱ्या प्रा. सुनील धोणुकसे व श्रद्धा धोणुकसे या दाम्पत्याच्या आणि संपूर्ण गुरुकुल परिवाराच्या गेल्या चार वर्षांच्या अथक परिश्रमातून ही भव्य अद्ययावत वास्तू उभी राहिली आहे. या नव्या वास्तूत लेखी परीक्षा व मैदानी प्रशिक्षणासोबतच आरामदायी हॉस्टेल, उत्तम मेस आणि शांत वातावरणाची अभ्यासिका अशा सर्व अद्ययावत सुविधा एकाच छताखाली उपलब्ध झाल्या आहेत.
या वास्तूचे उद्घाटन प्रा. सुनील धोणुकसे यांच्या मातोश्री सौ. सुशीला धोणुकसे आणि वडील श्री. गणपती धोणुकसे यांच्या हस्ते रिबीन कापून करण्यात आले. कार्यक्रमाच्या सुरुवातीला अकॅडमीच्या १४ वर्षांच्या संघर्षाची व प्रवासाची चित्रफित दाखवण्यात आली, ती पाहून उपस्थितांचे डोळे पाणावले. त्यानंतर दीपप्रज्वलन व सरस्वती पूजनाने कार्यक्रमाची पुढील सुरुवात झाली. वास्तूच्या उभारणीत आर्थिक, शारीरिक व मानसिक मदत करणाऱ्या सर्व घटकांचा गुरुकुल परिवाराच्या वतीने मान्यवरांच्या हस्ते गौरव करण्यात आला.
कार्यक्रमात मार्गदर्शन करताना दयानंद कुबल यांनी सिंधुदुर्गच्या लाल मातीत इतिहास घडवण्याची ताकद असून विद्यार्थ्यांनी प्रशासकीय सेवेत जिल्ह्याचे नाव उज्ज्वल करण्याचे आवाहन केले. तर पद्मश्री परशुराम गंगावणे यांनी शून्यातून विश्व निर्माण करण्याची ताकद बाळगून मोठी स्वप्ने पूर्ण करण्यासाठी सातत्याने प्रयत्न करण्याचा सल्ला दिला. या सोहळ्याला संविता आश्रमचे संचालक संदीप परब, जि. प. सदस्या सुप्रिया वालावलकर, छोटू पारकर, क्रीडा कोच संकेत कदम, योगेश तावडे यांच्यासह अनेक मान्यवर, आजी-माजी विद्यार्थी आणि पालक मोठ्या संख्येने उपस्थित होते. कार्यक्रमाचे सूत्रसंचालन प्राचार्य बी. एस. जांभेकर यांनी केले, तर प्रा. सुनील धोणुकसे यांनी सर्वांचे आभार मानले.
