स्मार्ट प्रकल्पांतर्गत ५८.४० लाखांचा प्रकल्प; उमेद (MSRLM) अंतर्गत जिल्ह्यातील पहिल्या FPC चे भूमिपूजन
सावंतवाडी, दि.२२: उमेद – महाराष्ट्र राज्य ग्रामीण जीवनोन्नती अभियान व स्मार्ट प्रकल्पांतर्गत अनमोल प्रभागसंघ तळवडे कार्यक्षेत्रातील ‘भूमिमाता महिला शेतकरी उत्पादक कंपनी लि. मळगाव’ च्या २ TPD क्षमतेच्या काजू प्रक्रिया युनिटच्या नवीन इमारतीचा भूमिपूजन सोहळा मंगळवारी, दि. २१ जुलै रोजी नेमळे-पेंडूरकरवाडी (ता. सावंतवाडी) येथे अत्यंत उत्साहपूर्ण वातावरणात पार पडला. उमेद MSRLM अंतर्गत जिल्ह्यातील हे पहिल्या शेतकरी उत्पादक कंपनीचे (FPC) इमारत भूमिपूजन ठरले आहे. या नवीन इमारतीमुळे प्रशासकीय कामकाजाला गती मिळणार असून महिला शेतकऱ्यांना सर्व सेवा एकाच छताखाली उपलब्ध होणार आहेत.
सावंतवाडी पंचायत समितीच्या सभापती श्रीम. सुस्मिता जाधव यांच्या शुभहस्ते या सोहळ्याचे भूमिपूजन संपन्न झाले. या प्रसंगी कंपनीच्या पुढील यशस्वी वाटचालीसाठी आणि उपक्रमासाठी सभापती जाधव यांनी मनःपूर्वक शुभेच्छा दिल्या. कार्यक्रमादरम्यान उपस्थितांना मार्गदर्शन करताना जिल्हा अभियान व्यवस्थापक कक्षाचे जिल्हा व्यवस्थापक श्री. अभिजित परब यांनी, महिला शेतकऱ्यांना संघटित करून शेतीमालाचे मूल्यवर्धन, प्रक्रिया, साठवणूक आणि थेट बाजारपेठ उपलब्ध करून देण्यासाठी शेतकरी उत्पादक कंपन्यांचे महत्त्व अधोरेखित केले.
या कंपनीसाठी स्मार्ट उपप्रकल्पांतर्गत ५८.४० लाख रुपयांचा प्रकल्प मंजूर करण्यात आला असून, त्यात ६० टक्के अनुदानाचा समावेश आहे. या सोहळ्यास तालुका अभियान व्यवस्थापन कक्ष सावंतवाडीच्या BMM श्रीम. स्वाती रेडकर, तळवडे प्रभाग समन्वयक सचिन नाईक, भूमिमाता कंपनीच्या अध्यक्षा निकिता बुगडे, सचिव रुपाली गुडेकर, कोषाध्यक्ष मयुरी दळवी यांच्यासह कंपनीच्या संचालक सौ. विशाखा ठाकूर, सौ. रंजना तेली, सौ. दीपाली हरमलकर, सौ. हर्षदा पेडणेकर आणि सौ. मनाली परब यांची प्रमुख उपस्थिती होती.
याशिवाय स्थानिक ग्रामस्थ, अनमोल प्रभागसंघाच्या सर्व कॅडर आणि कंपनीच्या महिला सभासद मोठ्या संख्येने उपस्थित होत्या. कार्यक्रमाच्या शेवटी कंपनीच्या सचिव सौ. रुपाली गुडेकर यांनी उपस्थित सर्व मान्यवर व उपस्थितांचे आभार मानले.
