सावंतवाडी,आनंद धोंड: निसर्गाच्या अथांग वरदानाने नटलेला आपला तळकोकण… आणि या सिंधुदुर्गच्या पवित्र मातीत ज्यांनी विकासाची एक नवी पहाट आणली; सत्तेला सेवेचे साधन मानून राजकारणात सुसंस्कृतपणाचा आणि अभ्यासूवृत्तीचा एक नवा वस्तुपाठ घालून दिला… असं एक कणखर, अभ्यासू, प्रेमळ आणि जनमानसावर अधिराज्य गाजवणारे नेतृत्व म्हणजेच आमदार दीपक वसंतराव केसरकर! 
१७ जुलै १९५५ रोजी सावंतवाडीच्या ऐतिहासिक आणि क्रांतीकारी भूमीत जन्मलेल्या दीपकभाईंच्या मनात सामाजिकतेची ऊर्मी शालेय जीवनापासूनच धगधगत होती. श्री पंचम खेमराज महाविद्यालयातून वाणिज्य शाखेची पदवी घेतल्यानंतर, त्यांनी
स्वतःला जनतेच्या सुख-दुःखात पूर्णपणे झोकून दिले. तरुण वयातच सावंतवाडी नगरीच्या नगराध्यक्षपदाची धुरा यशस्वीपणे सांभाळत, त्यांनी एका खऱ्या आणि दूरदृष्टी असलेल्या लोकनेत्याचा पाया रचला.
दीपकभाईंचा राजकीय आलेख हा कोणत्याही राजकीय लाटेवर किंवा समीकरणांवर नाही, तर केवळ आणि केवळ जनतेच्या अढळ, अतूट विश्वासावर उभा आहे. २००९ च्या विधानसभा निवडणुकीत विजयाचे पहिले पाऊल पडले आणि त्यानंतर २०१४, २०१९ आणि २०२४ अशा सलग चार निवडणुकांमध्ये मतदारसंघातील जनतेने त्यांच्यावर प्रेमाची आणि विश्वासाची अखंड मोहोर उमटवत विजयाचा अभूतपूर्व ‘चौकार’ साजरा केला!
काळ बदलला, पक्ष बदलले, पण ‘माझा मतदारसंघ आणि माझे लोक’ हा दीपकभाईंच्या जाहीरनाम्यातील एकमेव आणि अंतिम अजेंडा राहिला. केवळ आमदार म्हणून नव्हे, तर राज्याचे गृह, वित्त व नियोजन राज्यमंत्री आणि नंतर शालेय शिक्षण व मराठी भाषा कॅबिनेट मंत्री म्हणून त्यांनी आपल्या कार्यकर्तृत्वाचा एक अमीट ठसा संपूर्ण महाराष्ट्रावर उमटवला.
राज्यातील शाळांचा कायापालट करणे असो, की मायबोली मराठी भाषेला अभिजात दर्जा मिळवून देण्यासाठी घेतलेले ऐतिहासिक निर्णय असोत, राज्याने त्यांच्या प्रशासकीय कौशल्याची आणि दूरदृष्टीची साक्ष पाहिली आहे. सिंधुदुर्ग आणि देशाची आर्थिक राजधानी असलेल्या मुंबईचे पालकमंत्री म्हणून काम करताना त्यांनी प्रशासनावरील आपली मजबूत पकड आणि विकासकामांचा झंझावाती वेग संपूर्ण महाराष्ट्राला दाखवून दिला.
सावंतवाडी, वेंगुर्ला आणि दोडामार्ग या संपूर्ण परिसराला पर्यटनाच्या जागतिक नकाशावर मानाचे स्थान मिळवून देण्याचे स्वप्न दीपकभाईंनी केवळ पाहिले नाही, तर ते अहोरात्र कष्ट उपसून प्रत्यक्षात आणले. ऐतिहासिक मोती तलावाचे विहंगम सौंदर्य असो, सावंतवाडीच्या पारंपरिक लाकडी खेळण्यांच्या जागतिक ब्रँडिंगला दिलेली नवसंजीवनी असो, की ग्रामीण भागातील दुर्गम रस्ते, पूल आणि आरोग्याविषयीच्या पायाभूत सुविधांचा विस्तार असो… आज मतदारसंघाचा कोनाकोपरा त्यांच्या विकासकामांची साक्ष देत बोलका झाला आहे.
विरोधासाठी विरोध न करता, केवळ आणि केवळ सकारात्मक विकासाचे राजकारण करणारा हा सुसंस्कृत लोकनेता आज प्रत्येकाच्या गळ्यातील ताईत बनला आहे. जनतेच्या मनातील याच हक्काच्या स्थानाला आणि अखंड कार्यमग्न असणाऱ्या आपल्या लाडक्या नेत्याला, आदरणीय दीपकभाई केसरकर यांना ‘कोकण दर्शन डिजिटल मीडिया’ या न्यूज चॅनल कडून वाढदिवसाच्या कोटी कोटी शुभेच्छा! त्यांना दीर्घायुष्य आणि उत्तम आरोग्य लाभो, हीच साईबाबांच्या चरणी प्रार्थना!
