सावंतवाडी, दि.१६: येथील ज्येष्ठ पत्रकार आणि ‘कोकण लाईव्ह ब्रेकिंग न्यूज’ चॅनेलचे संपादक सीताराम गावडे यांचे द्वितीय सुपुत्र समर्थ सीताराम गावडे (वय १६) याचे बुधवारी रात्री १० वाजण्याच्या सुमारास दुःखद निधन झाले. गेल्या १५ वर्षांपासून तो मेंदूच्या आजाराशी झुंज देत होता. त्याच्या अकाली जाण्याने सावंतवाडी परिसरासह पत्रकार वर्तुळात हळहळ व्यक्त होत आहे.
मिळालेल्या माहितीनुसार, समर्थ जन्माच्या तिसऱ्या दिवसापासूनच एका गंभीर आजाराने ग्रस्त होता. त्याच्या छोट्या मेंदूला इजा झाल्यामुळे तो गेल्या १५ वर्षांपासून अंथरुणावरच होता. सीताराम गावडे यांनी त्याच्यावर वेगवेगळ्या नामांकित रुग्णालयांमध्ये नेऊन उपचारही केले होते. मात्र, बुधवारी रात्री त्याची प्राणजोत मालवली.
बुधवारी रात्री उशिरा येथील उपरल स्मशानभूमीत शोकाकुल वातावरणात त्याच्यावर अंत्यसंस्कार करण्यात आले. त्याच्या पश्चात आई संयुक्ता, वडील सीताराम, भाऊ साईश, बहिणी, काका, काकी असा मोठा परिवार आहे. समर्थच्या निधनामुळे गावडे कुटुंबीयांवर दुःखाचा डोंगर कोसळला असून, स्थानिक नागरिक आणि पत्रकार बांधवांनी त्यांच्या निवासस्थानी भेट देऊन सांत्वन केले.
