वेंगुर्ला तालुका वीज ग्राहक संघटनेकडून महावितरणचा जाहीर निषेध; तक्रारींचे निवारण न झाल्याने ग्रामस्थ आक्रमक
शिरोडा, दि.११: वेंगुर्ला तालुका वीज ग्राहक संघटना आणि स्थानिक वीज ग्राहकांच्या विविध समस्यांवर चर्चा करण्यासाठी आयोजित करण्यात आलेल्या तातडीच्या बैठकीकडे महावितरणच्या अधिकाऱ्यांनी पूर्णपणे पाठ फिरवल्याचा प्रकार समोर आला आहे. पूर्व नियोजित बैठक असतानाही एकही अधिकारी उपस्थित न राहिल्याने संतप्त झालेल्या वीज ग्राहकांनी महावितरणच्या अधिकाऱ्यांचा जाहीर निषेध केला.
शिरोडा येथील माऊली सभागृहात काल, दिनांक १० जुलै २०२६ रोजी दुपारी ३ वाजता या विशेष बैठकीचे आयोजन करण्यात आले होते. वेंगुर्ला तालुक्यातील वीज ग्राहकांना भेडसावणाऱ्या विविध समस्या आणि तक्रारींवर महावितरणच्या अधिकाऱ्यांसमक्ष तोडगा काढणे हा या बैठकीचा मुख्य उद्देश होता. मात्र, बैठकीची पूर्वकल्पना देऊनही वीज वितरण कंपनीचा एकही जबाबदार अधिकारी या ठिकाणी उपस्थित राहिला नाही.
आपल्या न्याय्य हक्कांसाठी आणि तक्रारींची नोंद करण्यासाठी तालुक्यातील अनेक गावांमधून वीज ग्राहक मोठ्या संख्येने उपस्थित होते. अधिकाऱ्यांच्या या बेजबाबदार आणि आडमुठ्या धोरणामुळे उपस्थित नागरिकांमध्ये तीव्र संतापाची लाट पसरली. महावितरणच्या या मनमानी कारभाराविरोधात बैठकीतच अधिकाऱ्यांचा जाहीर निषेध करण्यात आला.
या तातडीच्या सभेला वीज ग्राहक संघटना सिंधुदुर्ग समन्वयक ॲड. नंदन वेंगुर्लेकर, आरोंदा जिल्हा परिषद सदस्य सुधा कवटणकर, शिरोडा ग्रामपंचायत सदस्य चंदन हाडकी,पांडुरंग नाईक, प्रमोद नाईक,तातोबा कुडव*, आरवलीचे सरपंच समिर कांबळी, तसेच डीचोलक, काकतकर,आडारकर, दत्तगुरु परब,किशोर परब, राजू आदुरलेकर, संदिप गावंडे,आबा चिपकर यांच्यासह परिसरातील अनेक ग्रामस्थ आणि वीज ग्राहक मोठ्या संख्येने उपस्थित होते. अधिकाऱ्यांच्या गैरहजेरीमुळे संतप्त झालेल्या ग्राहकांनी आता या प्रकरणी पुढील तीव्र आंदोलनाचा इशारा दिला आहे.
