सिंधुदुर्ग जिल्हा सहकारी मंडळाच्या नूतन कार्यालयाचे दिमाखात उद्घाटन; सहकार महर्षी शिवरामभाऊ जाधव यांच्या जयंतीचे औचित्य
सिंधुनगरी, दि.०३: सिंधुदुर्ग जिल्हा बँकेच्या माध्यमातून सिंधुदुर्ग जिल्हा सहकारी मंडळाला प्रशिक्षणाबाबत यापुढेही अधिक सहकार्य केले जाईल, जेणेकरून जिल्ह्यातील सहकारी चळवळ अधिक गतिमान होण्यास मदत होईल. तसेच सहकारी मंडळाला जिल्हा बँकेचे नेहमीच सहकार्य लाभेल, असे प्रतिपादन सिंधुदुर्ग जिल्हा बँकेचे अध्यक्ष मनीष दळवी यांनी केले. सिंधुदुर्ग जिल्हा सहकारी मंडळ, सिंधुनगरी (ओरोस) येथील मंडळाच्या नूतन कार्यालयाचा उद्घाटन सोहळा नुकताच बँकेचे अध्यक्ष मनीष दळवी यांच्या हस्ते फीत कापून पार पडला, या प्रसंगी ते मुख्य उद्घाटक म्हणून बोलत होते.
जिल्हा बँकेचे माजी अध्यक्ष आणि सहकार क्षेत्रातील दिग्गज व्यक्तिमत्त्व ‘सहकार महर्षी’ दिवंगत शिवरामभाऊ जाधव यांच्या जयंती दिनाचे औचित्य साधून या नूतन कार्यालयाचा उद्घाटन सोहळा आयोजित करण्यात आला होता. दिवंगत शिवरामभाऊ जाधव यांनी संपूर्ण जिल्ह्यामध्ये सहकारी चळवळ निकोप आणि पारदर्शक पद्धतीने वाढवण्यासाठी आयुष्यभर मोठे प्रयत्न केले, याचे स्मरण या वेळी करण्यात आले. ‘दि महाराष्ट्र राज्य सहकारी संघ मर्यादित, पुणे’ अंतर्गत कार्यरत असलेले सिंधुदुर्ग जिल्हा सहकारी मंडळ संपूर्ण जिल्ह्यात सहकारी शिक्षण, प्रशिक्षण, प्रचार आणि सहकाराच्या प्रसिद्धीचे महत्त्वपूर्ण काम करते. या मंडळाला सिंधुनगरी ओरोस येथे जिल्हा बँकेने नूतन कार्यालय उपलब्ध करून दिल्याबद्दल मंडळाचे अध्यक्ष गजानन सावंत यांनी जिल्हा बँकेचे आणि अध्यक्ष मनीष दळवी यांचे विशेष आभार मानले.
या दिमाखदार सोहळ्याला सिंधुदुर्ग जिल्हा सहकारी मंडळाचे अध्यक्ष गजानन सावंत, उपाध्यक्ष सुभाष तळवडेकर, संचालक विलासराव ऐनापुरे, विनोद मर्गज, तसेच जिल्हा बँक संचालक विद्याप्रसाद बांदेकर, बँकेचे उपमुख्य कार्यकारी अधिकारी प्रमोद गावडे, सिंधुदुर्ग जिल्हा सहकार मंडळाचे सहकार विकास अधिकारी मंगेश पांचाळ यांच्यासह जिल्हा बँकेचे सर्व अधिकारी आणि पदाधिकारी मोठ्या संख्येने उपस्थित होते.
