१९ मे रोजी रंगणार पुरस्कार सोहळा
दोडामार्ग,दि.१६: समाजातील तळागाळातील घटकांसाठी कार्य करणाऱ्या आणि गावच्या विकासापासून सामाजिक प्रक्रियेपर्यंत मोलाचा हातभार लावणाऱ्या व्यक्तिमत्वांचा शोध घेऊन त्यांना सन्मानित करण्याचा स्तुत्य उपक्रम साईश्रद्धा दिव्यांग, निराधार, गरजू संघटना, कोलझर-दोडामार्ग यांनी हाती घेतला आहे. या संघटनेच्या वतीने विविध क्षेत्रांत उल्लेखनीय कामगिरी करणाऱ्या मान्यवरांसाठी विशेष पुरस्कार जाहीर करण्यात आले असून, यामध्ये सावंतवाडीचे पत्रकार ॲड. संतोष सावंत यांचाही समावेश आहे. या पुरस्कारांचा वितरण सोहळा येत्या १९ मे रोजी मोठ्या उत्साहात संपन्न होणार आहे.
साईश्रद्धा दिव्यांग, निराधार, गरजू संघटना ही दोडामार्ग तालुक्यात सामाजिक उपक्रम राबवण्यात नेहमीच अग्रस्थानी असते. दिव्यांगांचे प्रश्न असोत किंवा निराधारांना मिळणारी मदत, या संघटनेने आपल्या कार्याचा ठसा उमटवला आहे. केवळ सेवाभावी कार्य करून न थांबता, समाजात चांगलं काम करणाऱ्या हातांना बळ मिळावे आणि त्यांच्या कार्याची दखल घेतली जावी, या उद्देशाने संस्था दरवर्षीप्रमाणे यंदाही गौरव सोहळ्याचे आयोजन करत आहे. यावर्षीच्या पुरस्कारांसाठी निवडण्यात आलेल्या मान्यवरांच्या नावांची अधिकृत घोषणा संघटनेचे अध्यक्ष साबाजी सावंत, सचिव सौ. धारिणी देसाई, उपाध्यक्ष श्रीम. मंदोदरी देसाई व सर्व संचालकांनी मिळून केली आहे.
या गौरव सोहळ्यात विविध क्षेत्रांतील मान्यवरांना सन्मानित केले जाणार आहे. यामध्ये पत्रकार ॲड. संतोष सावंत (सावंतवाडी) यांच्यासह एकनाथ नाडकर्णी, विकास कुलकर्णी, तरुण भारत संवादच्या सौ. अस्मिता भोसले (अध्यक्षा, भोसले पॉलिटेक्निक), दोडामार्ग येथील डॉ. दिव्या गवस, सिंधुदुर्ग जिल्हा बँकेचे मुख्य कार्यकारी अधिकारी दिवाकर देसाई (ओरोस), दोडामार्गचे पत्रकार वैभव साळकर, कोलझर सोसायटीचे चेअरमन तथा सामाजिक कार्यकर्ते व पोलीस पाटील तातोबा वामनराव देसाई, कोलझर जिल्हा परिषद शाळेचे मुख्याध्यापक अरुण पवार, तळकटचे सरपंच सुरेंद्र सावंत, रेडी येथील सामाजिक कार्यकर्ते सागर जयसिंग राणे, सावंतवाडी येथील इकरा कॉम्प्युटरच्या ताहिरा मुजीब अहमद सनदी, भेडशी येथील सामाजिक कार्यकर्ते साईनाथ शंकर डांगी आणि कोलझर येथील आशा सेविका सौ. यशोदा हरिश्चंद्र दळवी यांचा समावेश आहे. सामाजिक बांधिलकी जपत आपल्या कार्यकर्तृत्वाने समाजासमोर आदर्श ठेवणाऱ्या या व्यक्तिमत्वांचा सन्मान होणार असल्याने सर्व स्तरांतून त्यांचे अभिनंदन होत आहे. या सोहळ्याच्या माध्यमातून समाजातील दातृत्वाची आणि सेवेची भावना अधिक वृद्धिंगत होईल, असा विश्वास अध्यक्ष साबाजी सावंत यांनी व्यक्त केला आहे.
