सावंतवाडी,दि.१२: निसर्गरम्य आंबोली घाट आज एका हृदयद्रावक अपघाताने हादरून गेला. फरशांची वाहतूक करणाऱ्या एका भरधाव ट्रकने दुचाकीला दिलेल्या भीषण धडकेत निकिता प्रसाद राऊत या १० वर्षीय चिमुकलीचा जागीच मृत्यू झाला. या अपघातात तिची आई चैताली राऊत या गंभीर जखमी झाल्या असून त्या सध्या रुग्णालयात मृत्यूशी झुंज देत आहेत. आज सकाळी ११ वाजण्याच्या सुमारास घाटातील एका धोकादायक ‘यू’ आकाराच्या वळणावर हा काळजाचा ठोका चुकवणारा प्रसंग घडला. आईच्या कुशीत वाढणारे लेकरू तिच्याच डोळ्यासमोर कायमचे निघून गेल्याने घटनास्थळी उपस्थित असलेल्या प्रत्येकाच्या डोळ्यांतून अश्रू अनावर झाले होते.
अपघातानंतर ट्रक चालकाने भीतीपोटी घटनास्थळावरून पळ काढण्याचा प्रयत्न केला, मात्र काही अंतरावरच त्याचा ट्रक उलटला. या अपघातामुळे आंबोली घाटातील वाहतूक तब्बल अडीच तास पूर्णपणे ठप्प झाली होती. घटनेची माहिती मिळताच स्थानिक ग्रामस्थांनी मोठ्या संख्येने घटनास्थळी धाव घेतली आणि आक्रमक पवित्रा घेतला. “चालकाला आमच्या ताब्यात द्या,” अशी मागणी करत संतप्त ग्रामस्थांनी संताप व्यक्त केला, ज्यामुळे परिसरात काही काळ तणावाचे वातावरण निर्माण झाले होते. अखेर पोलिसांनी तातडीने हस्तक्षेप करत परिस्थिती नियंत्रणात आणली आणि संबंधितांना ताब्यात घेतले. या दुर्दैवी घटनेने संपूर्ण आंबोली परिसरावर शोककळा पसरली असून, निकिताच्या अकाली जाण्याने सर्वत्र हळहळ व्यक्त केली जात आहे.
