सावंतवाडी: सांस्कृतिक वारसा जपण्यासाठी सज्ज, सोबतच रंगणार चार दिवसीय फूड फेस्टिवल
सावंतवाडी,दि. २३: ओंकार कला मंच आणि पाटणकर एज्युकेशन ट्रस्टच्या वतीने सावंतवाडीत आयोजित करण्यात आलेल्या बहुप्रतिक्षित “मालवणी करंडक” महोत्सवाची घोषणा करण्यात आली आहे. या महोत्सवात मुंबई, पुणे, गोवा आणि सिंधुदुर्ग जिल्ह्यातील एकूण १२ दर्जेदार एकांकिका सादर होणार असून, कलेच्या या महाकुंभात पाच ज्येष्ठ कलाकारांचा ‘कला गौरव’ पुरस्कार देऊन सन्मान केला जाणार आहे. यात सावंतवाडीचे सचिन धोपेश्वरकर, कुडाळचे अंकुश कुंभार, मालवणचे सगुण पोळेकर, वेंगुर्ल्याचे आनंद नार्वेकर आणि कणकवलीचे भास्कर उर्फ भाई सामंत यांचा समावेश असल्याची माहिती स्वागत समितीचे अध्यक्ष बबन साळगावकर यांनी पत्रकार परिषदेत दिली.
हा महोत्सव २७ फेब्रुवारी ते २ मार्च या कालावधीत पालिकेच्या मेजर जनरल जगन्नाथराव भोसले उद्यानासमोर पार पडणार आहे. सावंतवाडीचा संस्थानकालीन आणि सांस्कृतिक वारसा जतन करण्यासोबतच स्थानिक कलाकारांना हक्काचे व्यासपीठ मिळावे, हा या आयोजनामागचा मुख्य उद्देश आहे. महोत्सवाच्या पहिल्या दिवशी, २७ फेब्रुवारीला मुंबईच्या मॅड बॉक्स थिएटरची ‘ठोंब्या’ ही एकांकिका सादर होईल. २८ फेब्रुवारीला ‘चित्रकथी’ (पुणे), ‘बार-बार’ (अंधेरी), ‘पडीक’ (कणकवली) आणि ‘लपंडाव’ या एकांकिकांचे सादरीकरण होईल. १ मार्च रोजी ‘भरकाट’, ‘देवराई’, ‘अमृत्सपुत्र’ आणि ‘वाघ्या’ या एकांकिका तर शेवटच्या दिवशी, २ मार्चला ‘गाऱ्हाणा’, ‘बोबड्या’ आणि ‘तुकारामाची टोपी’ या एकांकिका प्रेक्षकांचे मनोरंजन करतील.
या महोत्सवाचे आणखी एक विशेष आकर्षण म्हणजे सलग चार दिवस चालणारा ‘फूड फेस्टिवल’. पर्यटकांना आणि स्थानिक खवय्यांना मालवणी खाद्यसंस्कृतीसह बिर्याणी, चायनीज, मोमोज आणि पिझ्झा अशा विविध पदार्थांचा आस्वाद घेता येणार आहे. या माध्यमातून स्थानिकांना रोजगाराची संधी उपलब्ध करून देण्याचा मानस आयोजकांनी व्यक्त केला आहे. या पत्रकार परिषदेला महोत्सव समितीचे अध्यक्ष अमोल टेंबकर, उपाध्यक्ष ऋजूल पाटणकर, दादा मडकईकर, सचिव भुवन नाईक यांच्यासह इतर पदाधिकारी उपस्थित होते. जास्तीत जास्त कलाप्रेमींनी आणि पर्यटकांनी या महोत्सवाचा लाभ घ्यावा, असे आवाहन बबन साळगावकर यांनी केले आहे.
