गोवा,दि.२१: हेडलॅण्ड सडा येथील दीपविहार उच्च माध्यमिक विद्यालयात शिवजयंतीचा कार्यक्रम मोठ्या उत्साहात साजरा करण्यात आला. “दैनंदिन जीवनात प्रत्येकाने छत्रपती शिवाजी महाराज यांचे किमान एक-दोन गुण जरी आत्मसात केले, तरी जीवन सर्वांगीण सुंदर होण्यास वेळ लागणार नाही. आपण आपल्या कामाच्या ठिकाणी, समाज, राज्य आणि राष्ट्रीय पातळीचा विचार करून कार्याला सुरुवात केल्यास अपेक्षित बदल नक्कीच घडेल,” असे प्रतिपादन गोवा माध्यमिक व उच्च माध्यमिक शालांत मंडळाचे अध्यक्ष भगीरथ शेटये यांनी यावेळी केले.
दिनांक १९ रोजी शाळेच्या ‘दीपविहार गड’ येथे हा सोहळा संपन्न झाला. यावेळी व्यासपीठावर प्रमुख पाहुणे भगीरथ शेटये यांच्यासह दीपविहार उच्च माध्यमिक विद्यालयाच्या प्राचार्य मारीया डायस, पालक शिक्षक संघाच्या अध्यक्ष सौ. अक्षदा वाडेकर, शिवदास नाईक, नंदा होन्नावरकर, सेंट एन्डरुव शाळेच्या मुख्याध्यापिका झनायडा बारैटो आणि कार्यक्रम संयोजक प्रा. सुनील शेट उपस्थित होते. कार्यक्रमाची सुरुवात छत्रपती शिवाजी महाराज यांच्या अश्वारूढ पुतळ्याला पुष्पहार अर्पण करून करण्यात आली.
याप्रसंगी मार्गदर्शन करताना प्राचार्य मारीया डायस म्हणाल्या की, विद्यार्थ्यांनी चांगले गुण अंगीकारल्यास ते उत्तम जीवन जगू शकतात. प्रा. नंदकुमार सातार्डेकर यांनीही आपले मनोगत व्यक्त केले. कार्यक्रमादरम्यान प्रथम भोंसले, देवांश शेटये, भार्गव चौगुले, शशांक पेडणेकर, सिद्धांत पराडकर आणि निहार परब यांचा भगीरथ शेटये यांच्या हस्ते भेटवस्तू देऊन गौरव करण्यात आला. विद्यार्थी सिद्धांत पराडकर याने सादर केलेल्या धडाकेबाज ‘शिवगर्जना’ सादरीकरणाने उपस्थितांची मने जिंकली.
कार्यक्रमाचे प्रास्ताविक प्रा. सुनील शेट यांनी करून कार्यक्रमाचा उद्देश स्पष्ट केला, तसेच मान्यवरांचे स्वागत केले. विद्यार्थ्यांच्या हस्ते सर्व पाहुण्यांना पुष्पगुच्छ प्रदान करण्यात आले. या सोहळ्याला शाळेतील सर्व शिक्षक आणि शिक्षकेतर कर्मचारी मोठ्या संख्येने उपस्थित होते. कार्यक्रमाचे सूत्रसंचालन प्रा. सुदेश गांवकर यांनी केले, तर प्रा. सौ. मनिषा नाईक यांनी उपस्थितांचे आभार मानले.
