सावंतवाडी,दि.२०: तालुक्यातील कलंबिस्त इंग्लिश स्कूल कलंबिस्तचे माजी विद्यार्थी आणि नवनिर्वाचित पंचायत समिती सदस्य प्रथमेश प्रभाकर सावंत, तसेच माडखोल प्रभागाच्या नवनिर्वाचित जिल्हा परिषद सदस्या ॲड. शिवानी नाईक यांचा कलंबिस्त पंचक्रोशी शिक्षण प्रसारक मंडळ व कलंबिस्त इंग्लिश स्कूलच्या वतीने शाल, श्रीफळ व पुष्पगुच्छ देऊन विशेष सत्कार करण्यात आला. आपल्याच शाळेतून शिक्षण घेऊन सामाजिक व राजकीय क्षेत्रात उत्तुंग यश संपादन केल्याबद्दल संस्थेच्या वतीने या दोन्ही लोकप्रतिनिधींचे कौतुक करण्यात आले.
या सत्कार समारंभाप्रसंगी संस्थाध्यक्ष शिवाजी सावंत, संस्था संचालक कॅप्टन सुभाष सावंत, सूर्यकांत राजगे, पालक शिक्षक संघ उपाध्यक्ष सुभाष राऊळ, प्रशालेचे मुख्याध्यापक अभिजीत जाधव यांच्यासह प्रशालेचे सर्व शिक्षक, शिक्षकेतर कर्मचारी आणि विद्यार्थी मोठ्या संख्येने उपस्थित होते. यावेळी उपस्थित मान्यवरांनी दोन्ही नवनिर्वाचित सदस्यांना त्यांच्या पुढील सामाजिक आणि राजकीय वाटचालीस शुभेच्छा दिल्या.
सत्काराला उत्तर देताना पंचायत समिती सदस्य प्रथमेश सावंत म्हणाले की, माझ्या जडणघडणीत या प्रशालेचे आणि शिक्षकांचे योगदान अत्यंत महत्त्वपूर्ण आहे, म्हणूनच या प्रशालेचा मी सदैव ऋणी राहून सर्वतोपरी सहकार्य करण्याची भावना त्यांनी व्यक्त केली. जिल्हा परिषद सदस्या ॲड. शिवानी नाईक यांनीही आपल्या सत्काराबद्दल शाळा व संस्थेचे मनापासून आभार मानले.
