सावंतवाडी,दि.२२: सावंतवाडी नगर परिषदेच्या निवडणुकीत दणदणीत विजय मिळवलेले नवनिर्वाचित नगरसेवक संजू परब यांची शिवसेना ओबीसी व्हीजेएनटी जिल्हाप्रमुख सुदन उर्फ सुदा कवठणकर यांनी नुकतीच सदिच्छा भेट घेतली. या भेटीदरम्यान कवठणकर यांनी परब यांचा पुष्पगुच्छ देऊन विशेष सत्कार केला आणि त्यांच्या पुढील यशस्वी वाटचालीस शुभेच्छा दिल्या.
नुकत्याच पार पडलेल्या नगर परिषद निवडणुकीत संजू परब यांनी आपल्या प्रभागातून नेत्रदीपक विजय संपादन केला आहे. त्यांच्या या विजयानंतर राजकीय तसेच सामाजिक अशा सर्वच स्तरांतून त्यांच्यावर अभिनंदनाचा वर्षाव होत आहे. याच पार्श्वभूमीवर सुदन कवठणकर यांनी त्यांची भेट घेऊन आनंद व्यक्त केला.
यावेळी बोलताना सुदन कवठणकर म्हणाले की, “संजू परब यांचा विजय हा त्यांच्या दांडगा जनसंपर्क आणि केलेल्या कामाची पोचपावती आहे. येणाऱ्या काळात ते शहराच्या प्रलंबित प्रश्नांची सोडवणूक करून विकासात नक्कीच मोलाची भर घालतील, असा विश्वास मला वाटतो.”
या सदिच्छा भेटीच्या प्रसंगी स्थानिक कार्यकर्ते, दोन्ही नेत्यांचे समर्थक आणि हितचिंतक मोठ्या संख्येने उपस्थित होते. सर्वांनीच संजू परब यांच्या विजयाचा उत्साह साजरा करत त्यांना शुभेच्छा दिल्या.
