जागतिक छायाचित्र दिनानिमित्त आयोजन | सावंतवाडीच्या शिरशिंगे गावच्या सुपुत्राची चमकदार कामगिरी
कोल्हापूर,दि.२०: कोल्हापूर जिल्हा फोटोग्राफर्स को-ऑप. असोसिएशनच्या वतीने भारतीय स्वातंत्र्य दिन आणि जागतिक छायाचित्र दिनानिमित्त आयोजित जिल्हास्तरीय ऑनलाइन फोटोग्राफी स्पर्धेत कु. रघुनाथ संतोष राणे यांनी कॅमेरा विभागात प्रथम क्रमांक पटकावला. त्यांच्या या उल्लेखनीय यशाबद्दल विविध क्षेत्रांतून कौतुक होत आहे.
मूळचे सिंधुदुर्ग जिल्ह्यातील सावंतवाडी तालुक्यातील शिरशिंगे गावचे रहिवासी असलेले रघुनाथ राणे हे ‘कोकण दर्शन डिजिटल मीडिया’चे जिल्हा व्हिडिओ जर्नलिस्ट म्हणून कार्यरत आहेत. स्पर्धेत त्यांनी सादर केलेल्या उत्कृष्ट छायाचित्राला परीक्षकांनी प्रथम क्रमांकाचा बहुमान दिला.
विवेकानंद कॉलेज आणि मान्यवरांकडून सत्कार
कमी वयात छायाचित्रण क्षेत्रात मिळवलेल्या या यशाबद्दल विवेकानंद कॉलेज, कोल्हापूरचे प्राचार्य, फोटोग्राफी विभागाचे प्रमुख सुतार सर, ग्राफिक्स विभागप्रमुख आणि सांस्कृतिक विभागप्रमुखांच्या हस्ते रघुनाथ राणे यांचा विशेष सत्कार करण्यात आला.
तसेच, या कामगिरीबद्दल ‘कोकण दर्शन डिजिटल मीडिया’ टीम, त्यांचे कुटुंबीय आणि मित्रपरिवाराकडून त्यांच्यावर शुभेच्छांचा वर्षाव होत आहे.
