सिंधुदुर्गात ‘रिव्हर्स मायग्रेशन’ची सुरुवात; रेडी बंदर, आरोंदा जेटी अन् ताज प्रकल्पही लवकरच मार्गी लाणार : पालकमंत्री नितेश राणे
सावंतवाडी,दि.१५: माजी मुख्यमंत्री व माजी पालकमंत्री खासदार नारायण राणे यांनी सिंधुदुर्ग जिल्ह्याच्या औद्योगिक विकासाचे आणि स्थानिकांना रोजगार उपलब्ध करून देण्याचे स्वप्न पाहिले होते, ते साकार करण्याचे काम प्रत्यक्षात सुरू झाले आहे. सावंतवाडी तालुक्यातील तळवणे येथे ‘झोया मरीन सर्व्हिसेस प्रायव्हेट लिमिटेड’च्या भव्य जहाज बांधणी प्रकल्पाच्या भूमिपूजनाने या विकासाची मुहूर्तमेढ रोवली गेली आहे, असे प्रतिपादन राज्याचे मत्स्य व्यवसाय व बंदरे विकास मंत्री तथा जिल्ह्याचे पालकमंत्री नितेश राणे यांनी केले. तळवणे येथे आयोजित या कार्यक्रमाप्रसंगी ते बोलत होते.
या प्रकल्पाच्या माध्यमातून तळवणे गावात सुरुवातीला २०० बोटी बनविण्याचे काम होणार असून, यातून स्थानिक २०० युवक-युवतींना रोजगाराच्या संधी उपलब्ध होणार आहेत. मुंबईतील ‘वॉटर मेट्रो’ या महत्त्वाकांक्षी प्रकल्पासाठी लागणाऱ्या बोटींची निर्मिती याच कारखान्यात चायना टेक्नॉलॉजीचा वापर करून केली जाणार आहे. कारखाना उभारणीनंतर अवघ्या दीड ते दोन महिन्यांत पहिली बोट तयार होईल, तसेच स्थानिक युवकांसाठी ट्रेनिंग सेंटरही उभारले जाणार आहे. ही सिंधुदुर्गात ‘रिव्हर्स मायग्रेशन’ची सुरुवात असून, आतापर्यंत गोव्यात जाणाऱ्या आपल्या तरुणांसाठी गोव्यातील कंपनीच महाराष्ट्रात आणण्याचे काम करण्यात आले आहे.
जिल्ह्याचा सर्वांगीण विकास साधण्यासाठी आरोंदा जेटी व रेडी बंदर पूर्ण क्षमतेने सुरू करण्याचा निर्धार व्यक्त करतानाच देवगड बंदर, शिरोडा वेळागर येथील ‘ताज’ पंचतारांकित हॉटेल प्रकल्प आणि दोडामार्गातील अडाळी एमआयडीसीतील उद्योग लवकरच मार्गी लागतील, असे पालकमंत्र्यांनी स्पष्ट केले. विरोधासाठी विरोध करणाऱ्या आणि दिशाभूल करणाऱ्या लोकांकडे दुर्लक्ष करून स्थानिकांनी विकासाची सवय लावून घ्यावी व आशावादी राहून सहकार्य करावे, असे आवाहनही त्यांनी यावेळी केले.
या ऐतिहासिक सोहळ्याला जिल्हा परिषद अध्यक्ष प्रमोद कामत, जिल्हा बँक अध्यक्ष मनीष दळवी, माजी आमदार राजन तेली, झोया मरीनचे संचालक जॉन फर्नांडिस व सूरज देवारीया, जमीन उपलब्ध करून देणारे डॉ. निलेश बाणावलीकर, युवराज लखमराजे भोसले, तळवणे सरपंच गोविंद केरकर यांच्यासह विविध लोकप्रतिनिधी, अधिकारी आणि ग्रामस्थ मोठ्या संख्येने उपस्थित होते. कार्यक्रमाचे प्रास्ताविक जॉन फर्नांडिस यांनी केले, सूत्रसंचालन निलेश पवार यांनी केले, तर आभार मेरिटाईम बोर्डाचे अधीक्षक अभियंता श्री. देवरे यांनी मानले.
