कोल्हापूर विभागीय केंद्राचे वरिष्ठ शैक्षणिक सल्लागार प्रा. संजय थोरात यांची सावंतवाडीत पत्रकार परिषदेत माहिती; ऑनलाईन प्रवेश प्रक्रिया सुरू
सावंतवाडी,दि.१३: यशवंतराव चव्हाण महाराष्ट्र मुक्त विद्यापीठाला विद्यापीठ अनुदान आयोगाची (UGC) मान्यता असून, या विद्यापीठाच्या पदवी व पदव्युत्तर पदव्या इतर मान्यताप्राप्त विद्यापीठांशी पूर्णपणे समकक्ष आहेत. एकाच वेळी एक शिक्षणक्रम पूर्ण करत असताना अन्य शिक्षणक्रमाच्या माध्यमातून विद्यार्थ्यांना ‘ड्युअल डिग्री’ मिळवण्याची सुवर्णसंधी विद्यापीठाने उपलब्ध करून दिली आहे, अशी माहिती कोल्हापूर विभागीय केंद्राचे वरिष्ठ शैक्षणिक सल्लागार प्रा. संजय थोरात यांनी सावंतवाडी येथे आयोजित पत्रकार परिषदेत दिली.
युजीसीच्या नव्या मार्गदर्शक सूचनेनुसार पदवी आणि पदव्युत्तर शिक्षणक्रमासोबतच विद्यार्थ्यांना पुन्हा एकदा संशोधन पदवी (Ph.D.) घेण्याची संधी उपलब्ध होणार आहे. विद्यार्थ्यांच्या रोजगाराभिमुख कौशल्यासाठी ‘पोर्ट मॅनेजमेंट’सारखे कोर्स सुरू करण्यात आले असून, शिक्षणप्रवाहातून बाहेर पडलेल्या विद्यार्थ्यांना पुन्हा ज्ञानगंगेत आणणे हा विद्यापीठाचा मुख्य उद्देश आहे. तसेच शिक्षण क्षेत्रात ‘एआय’च्या वापरावर विशेष भर दिला जात असल्याचे सांगतानाच, अभ्यासक्रमातील बदलामुळे पहिल्या वर्षी संदर्भ पुस्तका मिळण्यास काहीसा विलंब होत असला तरी त्यानंतरच्या वर्षात कोणतीही अडचण राहत नाही, असे प्रा. थोरात यांनी स्पष्ट केले.
महाराष्ट्र शासनाने मुक्त विद्यापीठातून उत्तीर्ण होणाऱ्या विद्यार्थ्यांच्या पदव्या शासकीय सेवा व पदोन्नतीसाठी ग्राह्य धरण्याबाबत शासन निर्णय निर्गमित केलेला आहे. १ जुलै १९८९ रोजी नाशिक येथे स्थापित या विद्यापीठाचे कार्यक्षेत्र संपूर्ण महाराष्ट्रभर पसरलेले असून ८ विभागीय केंद्रे आणि १६७५ पेक्षा जास्त अभ्यासकेंद्रांद्वारे १४५ हून अधिक शिक्षणक्रम चालवले जातात. दरवर्षी सुमारे ३.७४ लाख विद्यार्थी प्रवेश घेणाऱ्या या विद्यापीठाला सर्वोत्कृष्ट संस्थेसाठी ‘कॉमनवेल्थ ऑफ लर्निंग’ या संस्थेकडून आंतरराष्ट्रीय गुणवत्ता पुरस्काराने सन्मानित करण्यात आले आहे.
कोल्हापूर विभागीय केंद्रांतर्गत कोल्हापूर, सांगली, रत्नागिरी, सिंधुदुर्ग, बेळगाव आणि गोवा सीमा भागातील विद्यार्थ्यांसाठी १२० अभ्यासकेंद्रे सुरू असून जुलै २०२६ पासून ऑनलाईन पद्धतीने विविध शिक्षणक्रमांची प्रवेश प्रक्रिया सुरू करण्यात आली आहे. सिंधुदुर्ग जिल्ह्यात सध्या २२ अभ्यासकेंद्रे कार्यरत असून भविष्यात येथे अधिक अभ्यासकेंद्रे सुरू करण्याचा विद्यापीठाचा मानस आहे. प्रवेश इच्छुकांनी ycmou.digitaluniversity.ac.in किंवा ycmou.ac.in या संकेतस्थळाला अथवा थेट अभ्यासकेंद्रांशी संपर्क साधून आपला प्रवेश निश्चित करावा, असे आवाहन प्रा. थोरात यांनी केले. विद्यार्थ्यांच्या शैक्षणिक मार्गदर्शनासाठी ०२३१-२९९११७१ / ०२३१-२९९११७२ आणि मोबाईल क्र. ७४४७६०७०२२ / ७०३८६०७०२३ या क्रमांकांवर मदत कक्ष स्थापन करण्यात आला असून प्रवेशार्थींनी या सेवेचा लाभ घ्यावा, असे सांगण्यात आले. या पत्रकार परिषदेला सहाय्यक सल्लागार विजयसिंह रजपूत, केंद्र संयोजक तुषार वेंगुर्लेकर, यशवंत पाटील आदी उपस्थित होते.
