लोकमान्य टिळक पुण्यतिथी व अण्णाभाऊ साठे जयंतीचे औचित्य; माजी विद्यार्थी नितीन धोंड यांचा उपक्रम
सावंतवाडी,दि.०३: तालुक्यातील शिरशिंगे येथील श्री पावणाई रवळनाथ विद्यामंदिरात लोकमान्य बाळ गंगाधर टिळक पुण्यतिथी आणि लोकशाहीर अण्णाभाऊ साठे जयंतीचे औचित्य साधून वक्तृत्व स्पर्धेचे यशस्वी आयोजन करण्यात आले. प्रशालेचे माजी विद्यार्थी नितीन धोंड यांनी आपले वडील कै. लक्ष्मण तुकाराम धोंड यांच्या स्मरणार्थ या स्पर्धेचे प्रायोजन केले होते. कार्यक्रमाचा प्रारंभ मान्यवरांच्या हस्ते लोकमान्य टिळक व अण्णाभाऊ साठे यांच्या प्रतिमांचे पूजन, पुष्पहार अर्पण आणि दीपप्रज्वलनाने झाला.
या सोहळ्याला प्रमुख पाहुणे म्हणून शिरशिंगे गावातील माजी सैनिक व ज्येष्ठ नागरिक विलास राणे उपस्थित होते. उपस्थितांना संबोधित करताना विलास राणे यांनी विद्यार्थ्यांना देशसेवेची प्रेरणा देत सैनिक भरती संदर्भात मोलाचे व सविस्तर मार्गदर्शन केले. केवळ मार्गदर्शनच नव्हे, तर त्यांनी प्रशालेतील भौतिक सुविधांच्या विकासासाठी औदार्य दाखवत आर्थिक सहकार्यही प्रदान केले. त्यांच्या या सामाजिक योगदानाबद्दल विद्यालयाच्या वतीने त्यांचे विशेष आभार मानण्यात आले.
सदर कार्यक्रमाच्या अध्यक्षस्थानी विद्यालयाचे मुख्याध्यापक श्री. समुद्रे हे होते, तर व्यासपीठावर शिक्षिका सौ. संध्या पवार, सौ. सायली परब आणि श्री. सुमंत राऊळ यांची प्रमुख उपस्थिती होती. आयोजित वक्तृत्व स्पर्धेत विद्यार्थ्यांनी उत्स्फूर्तपणे सहभाग नोंदवत आपले विचार प्रभावीपणे मांडले. या स्पर्धेत कुमारी अक्षरा राऊळ हिने प्रथम, कुमारी देवयानी राऊळ हिने द्वितीय, तर कुमार रतन देसाई याने तृतीय क्रमांक पटकावला. सर्व विजेत्या स्पर्धकांचे मान्यवरांच्या हस्ते कौतुक करून त्यांना सन्मानित करण्यात आले.
कार्यक्रमाचे नेटके आणि सूत्रबद्ध संचालन सौ. पवार यांनी केले, तर उपस्थितांचे आभार श्री. सुमंत राऊळ यांनी मानले. ही स्पर्धा यशस्वी पार पाडण्यासाठी प्रशालेचे कर्मचारी संतोष राणे, विठ्ठल धोंड, संदीप जाधव आणि आबा डोईफोडे यांनी विशेष परिश्रम घेतले. माजी विद्यार्थी नितीन धोंड यांनी आपल्या वडिलांच्या स्मृती जपत सामाजिक व शैक्षणिक बांधिलकीतून राबवलेल्या या स्तुत्य उपक्रमाचे शिरशिंगे परिसरासह सर्व स्तरांतून कौतुक होत आहे.
