नगराध्यक्षा श्रद्धाराजे भोंसले यांचा इशारा; रहिवाशांना पाण्यासाठी वणवण सहन करावी लागल्याने नगरपरिषदेकडून तातडीने पाणीपुरवठा करण्याचे आश्वासन.
सावंतवाडी, दि.०९: येथील न्यू सबनिसवाडा भागातील टीचर कॉलनी सोसायटीच्या बांधकामास संबंधित बिल्डरला दिलेली परवानगी ही प्रशासकीय काळातील असून, या बिल्डरने नागरिकांची मोठी फसवणूक केल्याचा गंभीर आरोप येथील रहिवाशांनी केला आहे. या इमारतीला राहण्याची परवानगी म्हणजेच भोगवटा प्रमाणपत्र (ओसी) प्रशासनाने नेमकी कशी मंजूर केली, असा संतप्त सवाल रहिवाशांनी उपस्थित केला आहे. या पार्श्वभूमीवर, प्रशासकीय काळातील या संशयास्पद कामकाजाची सखोल चौकशी लावली जाईल आणि यात कोणीही दोषी आढळल्यास त्यांच्यावर कडक कारवाई केली जाईल, असा थेट इशारा सावंतवाडीच्या नगराध्यक्षा श्रद्धाराजे भोंसले यांनी दिला आहे. आज सायंकाळी त्यांनी न्यू सबनिसवाडा येथे जाऊन बाधित नागरिकांची भेट घेतली आणि त्यांना धीर दिला.
नगराध्यक्षा सौ. भोंसले यांनी नागरिकांशी संवाद साधताना सांगितले की, संबंधित बिल्डरने केलेल्या फसवणुकीमुळे सध्या या भागातील नागरिकांना पाण्याचा तीव्र तुटवडा आणि गैरसोयीचा सामना करावा लागत आहे. नगरपरिषदेचे नळ कनेक्शन थेट सोसायटीच्या पाण्याच्या टाकीत सोडून, तीच स्वतःची विहीर असल्याचे भासवून बिल्डरने येथील रहिवाशांची शुद्ध दिशाभूल केल्याचा धक्कादायक आरोप स्थानिक नागरिकांनी केला आहे. या गंभीर प्रकारामुळे नागरिकांमध्ये प्रचंड संताप आहे. प्रशासकीय राजवटीच्या काळात या बांधकामाला कशा प्रकारे परवानग्या दिल्या गेल्या, याकडे आता विशेष लक्ष वेधले गेले असून, या संपूर्ण प्रकरणाची चौकशी करून कायद्याचा बडगा उगारला जाईल, असे नगराध्यक्षांनी स्पष्ट केले.
दुसरीकडे, बिल्डरच्या या कारभारामुळे सोसायटीतील लहान मुलांना वेळेवर आणि स्वच्छ पाणी मिळत नसल्याने अनेकांचे आरोग्य धोक्यात आले आहे. वृद्ध आणि ज्येष्ठ नागरिकांनाही पाण्यासाठी प्रचंड मानसिक व शारीरिक त्रास सहन करावा लागत आहे. नागरिकांची ही दयनीय अवस्था पाहून, उद्याच नगरपरिषदेच्या वतीने या ठिकाणी पिण्याच्या पाण्याची तात्पुरती सोय तातडीने करून दिली जाईल, असा विश्वास पाणीपुरवठा सभापती प्रतीक बांदेकर यांनी यावेळी दिला. या महत्त्वपूर्ण दौऱ्यादरम्यान नगराध्यक्षा श्रद्धाराजे भोंसले यांच्यासह सभापती सुधीर आडिवरेकर, आनंद नेवगी, दिपाली भालेकर, प्रतीक बांदेकर, सुनिता पेडणेकर, ॲड. सिद्धार्थ भांबुरे, निलम नाईक, दुलारी रांगणेकर, सुकन्या टोपले यांच्यासह न्यू सबनिसवाडा येथील टीचर कॉलनी सोसायटीचे अनेक रहिवासी मोठ्या संख्येने उपस्थित होते.
