वाढलेल्या उंचीमुळे वाहनांचे नुकसान होत असल्याने वाहनधारक हैराण; शेतकऱ्यांना जमिनीचा मोबदला देण्याचीही मागणी
सावंतवाडी,दि.०६: सावंतवाडी-मळगाव रेल्वे फाटक निरवडे मार्गावर असलेल्या गतिरोधकांची उंची प्रमाणापेक्षा जास्त असल्याने ती तात्काळ कमी करावी, अशी मागणी मळेवाड-कोंडुरे गावचे उपसरपंच हेमंत मराठे यांनी सार्वजनिक बांधकाम विभागाकडे केली आहे. काही वर्षांपूर्वी या मार्गावरून मोठ्या प्रमाणात लोहखनिजाची डंपरद्वारे वाहतूक होत असल्याने अपघात टाळण्याच्या उद्देशाने हे गतिरोधक उभारण्यात आले होते. तत्कालीन परिस्थितीत हा रस्ता काही अंशी डांबरी तर काही अंशी मातीचा असल्याने डंपर व्यतिरिक्त इतर वाहनांची वर्दळ खूपच कमी होती. मात्र, आता सार्वजनिक बांधकाम विभागाने या संपूर्ण मार्गाचे डांबरीकरण केल्यामुळे या रस्त्यावरील वाहतूक प्रचंड वाढली आहे. अशा स्थितीत पूर्वीचे जास्त उंचीचे गतिरोधक आता वाहनचालकांसाठी मोठे डोकेदुखी ठरत असून लहान-मोठ्या गाड्यांच्या खालचा भाग या गतिरोधकांना घासतो. यामुळे वाहनांचे मोठे नुकसान होऊन वाहनधारकांना नाहक आर्थिक भुर्दंड सोसावा लागत असल्याने या गतिरोधकांची उंची तात्काळ कमी करणे गरजेचे बनले आहे.
याचबरोबर या रस्त्याचा काही भाग स्थानिक शेतकऱ्यांच्या मालकीचा असून, सार्वजनिक बांधकाम विभागाने कोणतीही पूर्वपरवानगी न घेता खाजगी जागेतून रस्ता काढल्याचा आरोपही हेमंत मराठे यांनी केला आहे. यामुळे या मार्गावर दुरुस्ती किंवा इतर कामे करताना संबंधित शेतकरी कर्मचाऱ्यांना अटकाव करतात. ज्या शेतकऱ्यांच्या जमिनी सरकारने रस्ता रुंदीकरणासाठी किंवा निर्मितीसाठी संपादित केल्या आहेत, त्यांना योग्य मोबदला मिळाला पाहिजे अशी आग्रही मागणी त्यांनी केली आहे. बाधित शेतकऱ्यांना त्यांच्या हक्काचा मोबदला मिळावा यासाठी आपण स्वतः सार्वजनिक बांधकाम विभाग आणि रेल्वे प्रशासनाला निवेदन देऊन पाठपुरावा करणार असल्याचे त्यांनी स्पष्ट केले.
दरम्यान, मळगाव बाजारपेठ येथील जिल्हा परिषद शाळेसमोरील गतिरोधकाच्या दोन्ही बाजूंना सध्या भलेमोठे खड्डे पडले असून या खड्ड्यांमुळे शाळकरी मुले आणि वाहनधारकांचा अपघात होण्याची दाट शक्यता निर्माण झाली आहे. सार्वजनिक बांधकाम विभागाने या ठिकाणचे खड्डे तात्काळ बुजवावेत, तेथील गतिरोधकाची उंची कमी करावी आणि वाहनचालकांना रात्रीच्या वेळीही गतिरोधकाचा अंदाज यावा यासाठी त्यावर पांढरे पट्टे मारावेत, अशी मागणीही उपसरपंच हेमंत मराठे यांनी शेवटी केली आहे.
