शाळा हेच कुटुंब मानून काम केले; कृतज्ञता सोहळ्यात मान्यवरांकडून गौरवोद्गार
सावंतवाडी,दि.०५ येथील श्रीदेवी माऊली शिक्षण प्रसारक मंडळ संचालित, माऊली माध्यमिक विद्यालय सोनुर्लीचे ज्येष्ठ कर्मचारी श्री. राजेंद्र उर्फ राजू गावकर हे ३२ वर्षांच्या प्रदीर्घ आणि निष्कलंक सेवेनंतर नुकतेच सेवानिवृत्त झाले. या निमित्ताने संस्था व विद्यालयाच्या वतीने त्यांचा एक भव्य दिव्य असा सेवानिवृत्ती कृतज्ञता सोहळा आयोजित करण्यात आला होता. या सोहळ्यात गावकर यांचा शाल, श्रीफळ आणि सन्मानपत्र देऊन सपत्नीक भावपूर्ण सत्कार करण्यात आला. श्री देवी सोनुर्ली माऊली देवस्थानचे मानकरी तथा माऊली शिक्षण प्रसारक मंडळाचे ज्येष्ठ सभासद शंकर उर्फ बाळा गावकर यांच्या हस्ते राजेंद्र गावकर यांना सन्मानित करण्यात आले.
राजेंद्र गावकर यांनी आपल्या ३२ वर्षांच्या प्रदीर्घ कार्यकाळात अत्यंत प्रामाणिकपणे सेवा बजावली. शाळा हे आपले कुटुंब मानून त्यांनी संस्थेच्या व शाळेच्या सर्वांगीण विकासासाठी मोलाचे योगदान दिले, अशा भावना उपस्थित मान्यवरांनी यावेळी व्यक्त केल्या. सत्काराला उत्तर देताना भावूक झालेल्या राजेंद्र उर्फ राजू गावकर यांनी उपस्थितांचे आभार मानले. मी जरी आज शासकीय सेवेतून निवृत्त होत असलो, तरी माऊली माध्यमिक विद्यालयाशी असलेले माझे नाते कधीच तुटणार नाही. शाळेच्या आणि संस्थेच्या सर्वांगीण विकासासाठी मी सदैव सहकार्य करण्यास तत्पर राहीन, असा शब्द त्यांनी यावेळी दिला.
या सोहळ्याला विद्यालयाचे सहाय्यक शिक्षक एम. जे. गवडळकर, पांडुरंग काकतकर, प्रदीप सावंत तसेच कर्मचारी एस. व्ही. नाईक, एस. जी. ओटवणेकर, एस. टी. जाधव, व्ही. एन. निर्गुण यांच्यासह शिक्षक-पालक संघाचे अध्यक्ष, पदाधिकारी, ग्रामस्थ, पालक वर्ग आणि विद्यार्थी मोठ्या संख्येने उपस्थित होते. उपस्थित सर्वांनीच निवृत्त कर्मचारी राजेंद्र गावकर यांना त्यांच्या पुढील भावी व सुखी आयुष्यासाठी भरभरून शुभेच्छा दिल्या. या कार्यक्रमाचे प्रास्ताविक मुख्याध्यापक अरूण तेरसे यांनी केले, सूत्रसंचालन प्रदिप परब यांनी केले तर आभार पांडुरंग काकतकर यांनी मानले.
अत्यंत नियोजनबद्ध आणि भव्य स्वरूपात पार पडलेल्या या कार्यक्रमाला न्हावेलीचे पंचायत समिती सदस्य शरद धाऊसकर, माजगाव मतदारसंघाचे पंचायत समिती सदस्य जितेंद्र गावकर, श्रीदेवी माऊली शिक्षण प्रसारक मंडळाचे अध्यक्ष दिगंबर मोर्ये, सोनुर्ली माऊली देवस्थानचे मानकरी भाई गावकर, संस्थेचे उपाध्यक्ष आनंद नाईक, सचिव नारायण मोर्ये, सहसचिव नागेश गावकर, खजिनदार भारती गावकर, मुख्याध्यापक अरूण तेरसे आणि मनोहर राऊळ आदी मान्यवर प्रामुख्याने उपस्थित होते. या प्रसंगी विशेष अतिथी शरद धाऊसकर आणि जितेंद्र गावकर यांचाही शाल व श्रीफळ देऊन खास सत्कार करण्यात आला.
