महाराष्ट्र चेंबर ऑफ कॉमर्स निवडणूक: उद्योग आणि व्यापारी क्षेत्रात नेतृत्वावर पुन्हा विश्वासाची मोहोर
सावंतवाडी,दि.१५: महाराष्ट्र चेंबर ऑफ कॉमर्स, इंडस्ट्रीज अँड ॲग्रीकल्चरच्या द्विवार्षिक निवडणुकीत सिंधुदुर्ग जिल्ह्यात ‘एकता पॅनेल’ने अभूतपूर्व यश संपादन केले आहे. जिल्ह्यातील सर्वच्या सर्व नऊ जागांवर दणदणीत विजय मिळवत एकता पॅनेलने आपले निर्विवाद वर्चस्व सिद्ध केले. या निकालामुळे जिल्ह्यातील उद्योग, व्यापार आणि उद्योजक क्षेत्रात एकता पॅनेलच्या नेतृत्वावर मतदारांनी पुन्हा एकदा जोरदार विश्वास दाखवला आहे.
चेंबरच्या फोर्ट, मुंबई येथील मुख्य कार्यालयात १५ जून रोजी ही मतमोजणी प्रक्रिया पार पडली. संपूर्ण महाराष्ट्रात निवडणूक प्रक्रिया राबविण्यात आली असली तरी प्रत्यक्ष निवडणूक केवळ नाशिक आणि सिंधुदुर्ग या दोन जिल्ह्यांतच झाली होती. त्यामुळे सिंधुदुर्गातील उद्योग व व्यापारी क्षेत्राचे या निकालाकडे विशेष लक्ष लागून राहिले होते. चेंबरचे बिनविरोध निवडून आलेले अध्यक्ष रविंद्र माणगावे तसेच चेंबरचे माजी अध्यक्ष व कोकणचे सुपुत्र डॉ. श्रीकृष्ण परब यांच्या मार्गदर्शनाखाली एकता पॅनेलने एकूण नऊ जागांसाठी ही निवडणूक लढवली होती. प्रचाराच्या सुरुवातीपासूनच आघाडीवर असलेल्या या पॅनेलच्या विजयावर अखेर मतदारांनीही शिक्कामोर्तब केले. या निवडणुकीत एकता पॅनेलला सिंधुदुर्ग जिल्हा व्यापारी महासंघ तसेच कुडाळ एमआयडीसी इंडस्ट्रीज असोसिएशनचा जाहीर पाठिंबा लाभला होता आणि या पाठिंब्याचे रूपांतर अखेर विक्रमी मताधिक्यात झाले.
या निवडणुकीत कोकण विभागीय अध्यक्षपदासाठी एकता पॅनेलचे संतोष राणे यांनी १८६ मते मिळवत शानदार विजय संपादन केला. तर मुंबई-कोकण विभागातील वरिष्ठ उपाध्यक्षपदासाठी सुधाकर शेट्टी यांनी तब्बल ८५४ मते मिळवत आपले वर्चस्व सिद्ध केले. सिंधुदुर्ग जिल्हा गव्हर्निंग कौन्सिलसाठी एकता पॅनेलच्या सर्वच उमेदवारांनी मोठ्या मताधिक्याने बाजी मारली. यामध्ये राजन नाईक यांना १७३ मते, ॲड. नकुल पार्सेकर यांना १६४ मते, मनोज वालावलकर यांना १५८ मते, विजय केनवडेकर यांना १४६ मते, मिलिंद प्रभू यांना १४२ मते, विशाल कामत यांना १४१ मते तर कुणाल वरसकर यांना १३९ मते मिळाली.
दुसरीकडे, विरोधी प्रगती पॅनेलला मात्र मतदारांनी स्पष्टपणे नाकारल्याचे निकालातून दिसून आले. प्रगती पॅनेलच्या उमेदवारांना या निवडणुकीत अत्यंत दारूण पराभवाचा सामना करावा लागला. त्यांचे उपाध्यक्षपदाचे उमेदवार भालचंद्र राऊत यांना केवळ ६६ मते मिळाली. तर इतर उमेदवारांमध्ये अन्वेषा आचरेकर यांना ७७, गंगाराम पै यांना ८४, अशोक सारंग यांना ८४, भालचंद्र सामंत यांना ८१, राजेंद्र गावकर यांना ६०, रामचंद्र घोगळे यांना ५० आणि उत्तम सराफदार यांना अवघ्या ३७ मतांवर समाधान मानावे लागले.
एकता पॅनेलच्या या ऐतिहासिक विजयाबद्दल चेंबरचे अध्यक्ष रविंद्र माणगावे, ट्रस्ट बोर्डाचे अध्यक्ष आशिष पेडणेकर, माजी उपाध्यक्ष डॉ. श्रीकृष्ण परब, कुडाळ एमआयडीसी इंडस्ट्रीज असोसिएशनचे अध्यक्ष मोहन होडावडेकर, सिंधुदुर्ग जिल्हा व्यापारी महासंघाचे अध्यक्ष संजय सावंत, सचिव राजू जठार, सामाजिक कार्यकर्ते रणजित देसाई तसेच विविध क्षेत्रांतील मान्यवरांनी विजयी उमेदवारांचे कौतुक करत त्यांच्यावर अभिनंदनाचा वर्षाव केला आहे. या विजयानंतर एकता पॅनेलच्या वतीने सर्व सुज्ञ मतदारांचे आभार व्यक्त करण्यात आले असून, आगामी काळात जिल्ह्यातील उद्योग व व्यापार क्षेत्राच्या सर्वांगीण विकासासाठी अधिक जोमाने कार्य करण्याचा ठाम निर्धार व्यक्त करण्यात आला आहे.
