सिंधुदुर्ग जिल्ह्याच्या शिरपेचात मानाचा तुरा; वर्धा येथील राज्यस्तरीय स्पर्धेत पटकावले यश
सिंधुदुर्ग,दि.१६: सावंतवाडी तालुक्यातील जिल्हा परिषद पूर्ण प्राथमिक शाळा, कोनशी येथील नवनियुक्त शिक्षणसेवक डॅा. राजेंद्र लक्ष्मण चव्हाण यांनी शैक्षणिक क्षेत्रात आपल्या संशोधक वृत्तीचा ठसा उमटवत सिंधुदुर्ग जिल्ह्याचे नाव राज्यस्तरावर उज्ज्वल केले आहे. वर्धा येथे पार पडलेल्या ‘राज्यस्तरीय शिक्षक व अधिकारी शोधनिबंध’ स्पर्धेत डॅा. चव्हाण यांनी उल्लेखनीय यश संपादन केले असून, राज्यातील पहिल्या १० सर्वोत्तम स्पर्धकांमध्ये त्यांचा द्वितीय क्रमांक आला आहे. त्यांच्या या घवघवीत यशामुळे जिल्ह्याच्या शैक्षणिक वर्तुळातून त्यांच्यावर अभिनंदनाचा वर्षाव होत आहे.
डॅा. राजेंद्र चव्हाण हे सेट, नेट-जेआरएफ आणि पीएच.डी. सारख्या उच्च पदव्यांनी विभूषित असूनही दुर्गम भागातील कोनशी येथील जिल्हा परिषद शाळेत ज्ञानदानाचे कार्य करत आहेत. शाळेत कार्यरत असताना त्यांनी सातत्यपूर्ण संशोधन, नाविन्यपूर्ण अध्यापन पद्धती, मुक्त शैक्षणिक साधनस्त्रोतांचा प्रभावी वापर आणि विद्यार्थीकेंद्रित शिक्षणावर विशेष भर दिला आहे. राज्य शैक्षणिक संशोधन व प्रशिक्षण परिषद (एससीईआरटी), महाराष्ट्र यांच्या वतीने राज्यातील शिक्षक आणि अधिकारी-कर्मचाऱ्यांसाठी एकूण ४३ विविध विषयांवर शैक्षणिक व संशोधनात्मक स्पर्धांचे आयोजन करण्यात आले होते. या स्पर्धेअंतर्गत डॅा. चव्हाण यांनी तालुका आणि विभागीय स्तरावर यश मिळवत राज्यस्तरीय स्पर्धेत आपले स्थान निश्चित केले होते.
या स्पर्धेसाठी डॅा. चव्हाण यांनी ‘उच्चप्राथमिक स्तरावरील शिक्षकांना वैज्ञानिक संकल्पनांचे आकलन आणि अध्ययन-अध्यापन करताना येणाऱ्या समस्या’ या विषयावर सखोल शोधनिबंध सादर केला होता. केवळ समस्या मांडून न थांबता, त्यांनी शिक्षकांसाठी वैज्ञानिक संकल्पनांचे अध्ययन अधिक सुलभ व्हावे यासाठी एका विशेष ‘स्वयं-अध्ययन मॉड्युल’ची निर्मिती करून त्याची शास्त्रीय मांडणी केली. विषयाची उपयुक्तता, संशोधनात्मक दृष्टिकोन, प्रभावी सादरीकरण आणि शैक्षणिक परिणामकारकता या निकषांवर परीक्षकांनी त्यांचे मूल्यमापन केले. त्यांच्या या प्रभावी मांडणीमुळेच त्यांना राज्यस्तरावर द्वितीय क्रमांकाने गौरवण्यात आले.
या यशाबद्दल शिक्षणाधिकारी (प्राथमिक) निलिमा नाईक, डायट सिंधुदुर्गचे प्राचार्य राजेंद्र कांबळे, बांदा प्रभाग शिक्षण विस्तार अधिकारी लक्षमीदास ठाकूर, तांबुळी केंद्रप्रमुख आर. बी. गावडे, तसेच शाळा व्यवस्थापन समितीचे अध्यक्ष सौरभ सिद्धये, मुख्याध्यापक सुरेश जाधव आणि समस्त ग्रामस्थांनी डॅा. चव्हाण यांचे कौतुक केले आहे. त्यांच्या या यशामुळे ग्रामीण भागातील शिक्षकांच्या संशोधन वृत्तीला नवी चालना मिळणार असल्याच्या भावना व्यक्त होत आहेत.
