सावंतवाडी, दि.१३: कोकणच्या लाल मातीतील संस्कृती आणि परंपरेचा समृद्ध वारसा जपत निरवडे ग्रामस्थांच्या सहकार्यातून यंदा एक ऐतिहासिक पाऊल उचलण्यात आले आहे. श्री देव महापुरुष कला क्रीडा मंडळ, निरवडे माळकरवाडी यांच्या पुढाकाराने निरवडे गावाच्या इतिहासात पहिल्यांदाच ‘निरवडे महोत्सव २०२६’ चे अत्यंत दिमाखदार आयोजन करण्यात आले असून, सध्या संपूर्ण तालुक्यात याच महोत्सवाची चर्चा रंगली आहे. येत्या ३ आणि ४ एप्रिल २०२६ रोजी निरवडे माळकरवाडीच्या निसर्गरम्य परिसरात हा सोहळा अत्यंत उत्साहात पार पडणार आहे.
या महोत्सवाचे मुख्य वैशिष्ट्य म्हणजे यात निव्वळ मनोरंजनावर भर न देता, त्यासोबतच सामाजिक बांधिलकीचा एक सुंदर संगम पाहायला मिळणार आहे. खवय्यांसाठी याठिकाणी जिभेचे चोचले पुरवणारे भन्नाट फूड स्टॉल्स उभारले जाणार असून, खरेदीची आवड असणाऱ्या नागरिकांसाठी आकर्षक शॉपिंग स्टॉल्सची मोठी रांग या ठिकाणी पाहायला मिळेल. तसेच घरातील लहान मुलांच्या आनंदासाठी खास बालोद्यानाची व्यवस्था करण्यात आली असून, कला आणि संगीत प्रेमींसाठी नामवंत कलाकारांच्या अप्रतिम कार्यक्रमांची मेजवानी येथे मिळणार आहे.
केवळ गावाची शोभा वाढवणे इतकाच या महोत्सवाचा उद्देश नसून स्थानिक कलागुणांना हक्काचे व्यासपीठ मिळवून देणे हा यामागचा मुख्य हेतू आहे. हा महोत्सव म्हणजे केवळ एक कार्यक्रम नसून ती खऱ्या अर्थाने निरवडेवासियांची अस्मितेची आणि उत्साहाची मोठी पर्वणी ठरणार आहे. या सोहळ्यासाठी आयोजकांनी सर्व ग्रामस्थांना आणि परिसरातील नागरिकांना आपल्या कुटुंबासह तसेच मित्रपरिवारासह सहभागी होण्याचे आग्रहाचे निमंत्रण दिले आहे.
