सावंतवाडी,दि.२०: छत्रपती शिवाजी महाराज यांच्या जयंतीनिमित्त सावंतवाडी एज्युकेशन सोसायटीच्या कळसुलकर प्राथमिक शाळेतर्फे शिवजयंतीचा सोहळा मोठ्या उत्साहात साजरा करण्यात आला. या निमित्ताने शाळेच्या इयत्ता पहिली ते चौथीच्या विद्यार्थ्यांनी ऐतिहासिक वेशभूषा परिधान करून भव्य ‘शिवरॅली’ काढली. कळसुलकर शाळा ते उभा बाजार येथील शिवस्मारकापर्यंत काढण्यात आलेल्या या रॅलीने संपूर्ण सावंतवाडी शहराचे लक्ष वेधून घेतले.
या रॅलीचे मुख्य आकर्षण म्हणजे विद्यार्थ्यांनी साकारलेल्या विविध ऐतिहासिक व्यक्तिरेखा होत्या. यामध्ये राजमाता जिजाऊ, छत्रपती शिवाजी महाराज, शंभूराजे, तानाजी मालुसरे, शिवा काशिद, सईबाई, सोयराबाई आणि हातात भगवे ध्वज घेतलेले छोटे मावळे अशा विविध रूपांत मुले सजली होती. सकाळी शाळेमध्ये मान्यवरांच्या हस्ते शिवप्रतिमेचे विधिवत पूजन झाल्यानंतर, ‘जय भवानी, जय शिवाजी’ अशा घोषणा देत रॅलीला सुरुवात झाली.
रॅली उभा बाजार येथील शिवपुतळ्यासमोर पोहोचल्यानंतर तेथे विविध कार्यक्रमांचे आयोजन करण्यात आले होते. सर्वप्रथम शाळेच्या मुख्याध्यापकांच्या शुभहस्ते शिवपुतळ्याला पुष्पहार अर्पण करून अभिवादन करण्यात आले. त्यानंतर इयत्ता तिसरीची विद्यार्थिनी कुमारी आत्रेया हिने अत्यंत जोशपूर्ण आवाजात ‘शिवगर्जना’ सादर केली, जिला उपस्थितांनी दाद दिली. या प्रसंगी विद्यार्थ्यांनी शिवरायांच्या जीवनावर आधारित भाषणे केली, तर शाळेचे सहाय्यक शिक्षक श्री. डी.जी. वरक यांनी खड्या आवाजात पोवाडा सादर करत विद्यार्थ्यांना शिवजन्माचा इतिहास व शिवरायांच्या कार्याची माहिती दिली.
या उपक्रमाचे स्थानिक नागरिकांनी विशेष कौतुक केले. स्थानिक मित्र मंडळाच्या वतीने रॅलीत सहभागी झालेल्या मुलांसाठी खाऊ तसेच अल्पोपहाराची व्यवस्था करण्यात आली होती. पुन्हा एकदा शिवरायांचा जयघोष करत ही रॅली शाळेकडे परतली आणि तिथेच कार्यक्रमाची सांगता झाली. हा सोहळा यशस्वी करण्यासाठी शाळेचे मुख्याध्यापक प्रदीप सावंत, शिक्षक डी.जी. वरक, अमित कांबळे, ज्योत्स्ना गुंजाळ, प्राची बिले, संजना आडेलकर, स्मिता घाडीगावकर, सर्व कर्मचारी, पालक आणि बहुसंख्य विद्यार्थी उपस्थित होते.
