सावंतवाडी,दि.१७: तालुक्यातील शिरशिंगे ग्रामपंचायत येथे माझी वसुंधरा अभियानांतर्गत स्वतंत्र दिनाचे औचित्य साधून १५ व १६ ऑगस्ट रोजी कोकण कला व शिक्षण विकास संस्था आणि ग्रामपंचायत शिरशिंगे यांच्या वतीने येथील महिलांसाठी कापडी पिशव्या बनविण्याची दोन दिवसाची कार्यशाळा घेण्यात आली.
प्रशिक्षण कार्यक्रमाच्या उद्घाटन शिरशिंगे ग्रामपंचायत सरपंच दीपक राऊळ, यांच्या हस्ते करण्यात आले.
यावेळी पंचायत समिती कृषी विस्तार अधिकारी एकनाथ सावंत, उपसरपंच सचिन धोंड, पोलीस पाटील गणू राऊळ,ग्रामसेवक स्वप्नील तारी,ग्रामसंघ अध्यक्ष सौ. सेजल लाड, ग्रामसंघ सचिव सौ.दिपाली दळवी प्रशिक्षक अर्चना वाडकर, सी आर पी(CRP) मयुरी राणे, प्रियांका जाधव, रविना राऊळ तसेच सामाजिक कार्यकर्ते,गावातील माजी सैनिक तसेच कोकण कला शिक्षण विकास संस्थेचे कार्यक्रम समन्वयक भगवान चव्हाण उपस्थित होते.
सर्व मान्यवरांचे कोकण कला यावेळी शिक्षण विकास संस्थेच्या वतीने भगवान चव्हाण यांनी स्वागत आणि कार्यक्रमाचे प्रास्ताविक केले.
दोन दिवस चाललेल्या या प्रशिक्षण कार्यक्रमामध्ये अर्चना वाडकर यांनी कापडी पिशव्यांचे विविध प्रकार शिकवले त्यामध्ये हॅन्ड बॅग, पाऊच, मोबाईल पर्स, पोटली बॅग, सिंगल बॅग, डबल चेन बॅग, बटवा,साधी पिशवी,फॅन्सी बॅग इत्यादींचा समावेश आहे. या प्रशिक्षणा साठी एकूण ४० महिला सहभागी झाल्या होत्या.
कापडी पिशव्या प्रशिक्षणाच्या माध्यमातून प्लास्टिक मुक्तीच्या दृष्टीने ग्रामपंचायत शिरशिंगे यांनी उचललेले पाऊल हे माझी वसुंधरा अभियानाला पूरक असे आहे. तसेच बचत गटातील महिलांसाठी या प्रशिक्षणामुळे आर्थिक पाठबळ मिळण्यासाठी उपयोग होईल तसेच तसेच घरच्या घरी टाकाऊ कापडापासून विविध प्रकारच्या टिकाऊ पिशव्या बनवून आणि त्याची विक्री करून थोडीफार बचती सोबत आर्थिक उत्पन्न करता येईल. अनेक वर्षे चांगल्या प्रकारे बचत गटा सोबत कुटुंबाची आर्थिक गणिते सांभाळताना महिला गटांनी गावाच्या अभियानात भाग घेत घरोघरी बायोगॅस, गांडूळ खत युनिट व शोषखड्डा या उपक्रमामध्ये सक्रिय सहभाग घेतला पाहिजे. असे आवाहन कृषी विस्तार अधिकारी श्री.सावंत यांनी केले.
हाती बनवलेल्या अशा वस्तू सण समारंभाला वाटता येऊ शकतात. व प्लास्टिक वापरू नको असे सांगताना काय वापरावे यासाठी गावातल्या लोकांनी शाश्वत पर्याय म्हणून कापडी पिशव्याचा वापर वाढवला पाहिजे व माझी वसुंधरा अभियानाला आवश्यक कापडी पिशव्या वाटप करण्यासाठी गावातीलच महिलांना १००० पिशव्या शिवण्याचे काम देत असल्याचे सरपंचानीं जाहीर केले. तसेच आपल्या कुटुंबस्तरावर बायोगॅस, गांडूळखत युनिट व शोष खड्डा करेल अशा महिलेला येणाऱ्या २६ जानेवारी रोजी प्रजासत्ताक दिनाला ध्वजारोहण करण्याचा मान दिला जाईल असे जाहीर केले. या निर्णयाचे उपस्थित सर्वांनी जोरदार टाळ्या वाजवून स्वागत केले.
महिलांनी पहिल्या दिवसाच्या ट्रेनींग मध्येच शिकल्यानुसार नंतर आपल्या घरी जुन्या कापडा पासून सुंदर पिशव्या व पर्स दुसऱ्या दिवशी येताना शिवून आणल्या त्यांचे वाडकर मॅडम यांनी कौतुक केले.
महिलांनी मनोगत व्यक्त करताना या प्रशिक्षणासाठी ग्रामपंचायत व कोकण संस्थेचे आभार मानले शेवटी ग्रामपंचायत सदस्य सौ. राऊळ, व ग्रामसंघ अध्यक्ष यांच्या हस्ते प्रमाणपत्र वितरण करून कार्यक्रमाचा समारोप करण्यात आला.
