१४, १७ आणि १९ वर्षांखालील गटांत विद्यार्थ्यांची पदकांची लयलूट; विविध क्रीडा प्रकारांत अव्वल कामगिरी
सावंतवाडी,दि.१७: तालुकास्तरीय शालेय मैदानी क्रीडा स्पर्धेत सिंधुदुर्ग सैनिक स्कूल अँड ज्युनिअर कॉलेज, आंबोलीच्या विद्यार्थ्यांनी सर्वंकष वर्चस्व गाजवत घवघवीत यश संपादन केले आहे. धावणे, लांब उडी, तिहेरी उडी, गोळाफेक, थाळीफेक आणि रिले अशा विविध मैदानी क्रीडा प्रकारांत येथील विद्यार्थ्यांनी प्रथम, द्वितीय व तृतीय क्रमांकांवर मोहर उमटवत शाळेच्या गौरवशाली क्रीडा परंपरेत आणखी एक मानाचा तुरा रोवला आहे.
स्पर्धेतील १४ वर्षांखालील मुलांच्या गटात १०० मीटर धावण्यात दत्ताराम गवस याने प्रथम, तर सत्यजीत हांडये याने द्वितीय क्रमांक पटकावला. ४०० मीटर धावण्यात वर्धन मलिक, तर ६०० मीटर धावण्यात देवांश मुद्रस याने अव्वल स्थान राखले. मैदानी कौशल्याचे उत्कृष्ट प्रदर्शन करत लांब उडीमध्ये शेवन परेरा आणि गोळाफेकमध्ये विग्नेश आपके यांनी प्रथम क्रमांक पटकावून शाळेचे नाव उंचावले. याच गटात ४ × १०० मीटर रिले स्पर्धेत दत्ताराम गवस, देवांश मुद्रस, सत्यजीत हांडये, वर्धन मलिक आणि आयुष रावत यांच्या चमूने दमदार कामगिरीची नोंद केली.
१७ वर्षांखालील मुलांच्या गटात विशेषतः लांब पल्ल्याच्या धावण्याच्या स्पर्धांमध्ये विद्यार्थ्यांनी चमकदार कामगिरी नोंदवली. ३००० मीटर धावण्यात ध्रुव संदीप नाईक (इ. ११ वी) याने प्रथम, तर आयुष प्रशांत चिरमुरे (इ. ९ वी) याने द्वितीय स्थान मिळविले. १५०० मीटर अंतरात रुद्र परेश सावंत (इ. ११ वी) याने बाजी मारत प्रथम क्रमांक पटकावला. ८०० मीटर धावण्यात ध्रुव संदीप नाईक याने प्रथम, तर अर्जुन सचिन कामती (इ. १० वी) याने द्वितीय स्थान मिळविले. ४०० मीटर धावण्यात तनिष्क महेश मुळीक (इ. ११ वी) याने प्रथम, तर पार्थ दीपक नाईक (इ. ११ वी) याने द्वितीय क्रमांक मिळवला. २०० मीटर धावण्याच्या शर्यतीत विनीत विनायक गवस (इ. १० वी) याने प्रथम आणि ओम राजेंद्र गोसावी (इ. ११ वी) याने द्वितीय क्रमांक मिळविला. १०० मीटर धावणे आणि तिहेरी उडी या दोन्ही प्रकारांत आर्यन गणेश वारेकर (इ. १० वी) याने दुहेरी प्रथम क्रमांक पटकावून आपल्या अष्टपैलू क्रीडागुणांची छाप पाडली. या गटातील ४ × १०० मीटर रिले स्पर्धेतही शाळेच्या संघाने प्रभावी सहभाग नोंदविला.
१९ वर्षांखालील मुलांच्या गटात १०० मीटर धावण्यात जय गावडे याने प्रथम, तर महादेव देवूलकर याने द्वितीय क्रमांक मिळविला. २०० मीटर धावण्यात अशोक घोडके, ४०० मीटर धावण्यात वेदांत वातकर आणि १५०० मीटर धावण्यात रोहित कानसे यांनी प्रतिस्पर्ध्यांवर मात करत प्रथम क्रमांक पटकावला. ३००० मीटर धावण्यात नील हेगिष्टे याने तृतीय क्रमांक मिळवला. मैदानी प्रकारांत प्रज्वल यादव याने लांब उडी आणि तिहेरी उडी या दोन्ही स्पर्धांमध्ये प्रथम क्रमांक पटकावून विशेष लक्ष वेधून घेतले. गोळाफेक प्रकारात ओंकार जाधव याने तृतीय, तर थाळीफेकमध्ये द्वितीय स्थान मिळवले. याशिवाय ४ × १०० मीटर रिले स्पर्धेत महादेव देवूलकर, प्रज्वल यादव, युवराज सावंत, जय गावडे आणि एकलव्य खुर्देकर यांच्या संघाने उत्कृष्ट समन्वय व संघभावनेचे दर्शन घडविले.
विद्यार्थ्यांच्या शिस्तबद्ध दिनचर्या, सातत्यपूर्ण सराव, जिद्द आणि कठोर मेहनतीच्या जोरावर हे यश प्राप्त झाले असून, या दैदिप्यमान कामगिरीबद्दल संस्थेचे अध्यक्ष सुनील राऊळ, सचिव जॉय डांटस, प्राचार्य नितीन गावडे, कार्यालयीन सचिव दीपक राऊळ, समस्त पालक, शिक्षकवृंद व क्रीडा प्रशिक्षकांनी यशस्वी विद्यार्थ्यांचे कौतुक करत त्यांना पुढील जिल्हास्तरीय स्पर्धांसाठी हार्दिक शुभेच्छा दिल्या आहेत.
