‘बुके आणि पोस्टर्स नकोत, जनसेवा हवी’; म्हापण दशक्रोशीतील हजारो नागरिकांनी घेतला मोफत आरोग्य तपासणीचा लाभ
वेंगुर्ला,दि.१३: वाढदिवसाच्या निमित्ताने होणारा पुष्पगुच्छ, सत्कार आणि फलकबाजीचा झगमगाट बाजूला ठेवत, थेट ग्रामीण भागातील आरोग्य आणि जलसंधारणाच्या कामांना प्राधान्य देणारा उपक्रम भाजप युवा नेते विशाल परब यांच्या वाढदिवसानिमित्त राबवण्यात आला. या संकल्पनेचा भाग म्हणून म्हापण येथे आयोजित करण्यात आलेल्या भव्य महाआरोग्य शिबिराला दशक्रोशीतील नागरिकांचा उत्स्फूर्त प्रतिसाद लाभला. हजारो ग्रामस्थांनी या शिबिरात विविध तपासण्या व तज्ज्ञ डॉक्टरांच्या मार्गदर्शनाचा लाभ घेतला.
पंतप्रधान नरेंद्र मोदी आणि प्रदेशाध्यक्ष रवींद्र चव्हाण यांच्या वाढदिवसाच्या निमित्ताने पालकमंत्री नितेश राणे यांच्या मार्गदर्शनाखाली जिल्ह्यात राबवण्यात आलेल्या ‘सेवा अभियाना’चाच हा पुढील टप्पा आहे. सावंतवाडी विधानसभा मतदारसंघात वाढदिवसाचा अनावश्यक खर्च टाळून लोकसहभागातून कच्चे बंधारे बांधणे आणि ग्रामीण भागात मोफत आरोग्य तपासणी शिबिरे आयोजित करण्याचा संकल्प यावेळी प्रत्यक्ष कृतीत उतरवला गेला.
म्हापण येथे पार पडलेल्या या शिबिराचे उद्घाटन माजी सभापती निलेश सामंत यांच्या हस्ते करण्यात आले. भाजप सिंधुदुर्ग व वेंगुर्ला तालुका शाखेच्या वतीने या शिबिराचे नेटके संयोजन करण्यात आले होते. ग्रामीण व दुर्गम भागातील गोरगरीब रुग्णांना एकाच छताखाली विविध तज्ज्ञ डॉक्टरांचा सल्ला आणि औषधोपचार उपलब्ध करून देण्यात आले.
या शिबिराच्या उद्घाटनप्रसंगी भाजप युवा नेते विशाल परब, जिल्हा परिषदेचे माजी शिक्षण व आरोग्य सभापती विकास गवंडे, प्रसन्न देसाई, माजी सरपंच तथा ग्रामपंचायत सदस्य गुरुनाथ मडवळ, निकित राऊळ, पाट गावच्या सरपंच साधना परब, बाबल गवंडे, सुदेश किनवडेकर, सुधीर ठाकूर यांच्यासह स्थानिक पदाधिकारी, कार्यकर्ते व नागरिक मोठ्या संख्येने उपस्थित होते.
