नागरिकांचा उत्स्फूर्त प्रतिसाद; अतुल काळसेकर यांच्या हस्ते उद्घाटन
दोडामार्ग,दि.१४: पंतप्रधान नरेंद्र मोदी यांच्या सेवाभावी विचारांतून, भाजपा प्रदेशाध्यक्ष रवींद्र चव्हाण यांच्या माध्यमातून आणि राज्याचे पालकमंत्री नितेश राणे यांच्या प्रेरणेने भाजपा राज्य युवा नेते विशाल परब यांच्या वाढदिवसानिमित्त दोडामार्ग येथे आयोजित करण्यात आलेल्या भव्य महाआरोग्य शिबिराला परिसरातील नागरिकांचा उत्स्फूर्त प्रतिसाद लाभला. सर्वसामान्य नागरिकांपर्यंत दर्जेदार आरोग्यसेवा पोहोचावी आणि गरजू रुग्णांना वेळेत वैद्यकीय उपचार मिळावेत, या सामाजिक उद्देशाने हा उपक्रम राबविण्यात आला. केवळ सत्कार आणि शुभेच्छांपुरते मर्यादित न राहता वाढदिवसाचे औचित्य साधून घेतलेल्या या आरोग्य शिबिराचे दोडामार्गवासीयांनी मनापासून स्वागत केले.
या महाआरोग्य शिबिराचे उद्घाटन महाराष्ट्र राज्य भाजपा उपाध्यक्ष तथा सिंधुदुर्ग जिल्हा बँकेचे उपाध्यक्ष अतुल काळसेकर यांच्या हस्ते श्रीफळ वाढवून करण्यात आले. यावेळी गोवा राज्य भाजपा युवा मोर्चाचे अध्यक्ष तुषार केळकर, युवा नेते विशाल परब, दोडामार्गचे नगराध्यक्ष चेतन चव्हाण, भाजपाचे माजी तालुकाध्यक्ष रंगनाथ गवस, पराशर सावंत आदी मान्यवर व्यासपीठावर उपस्थित होते. सामाजिक बांधिलकीतून सुरू असलेले हे शिबिर जनसेवेचे एक प्रभावी माध्यम ठरल्याची भावना यावेळी मान्यवरांनी व्यक्त केली.
कार्यक्रमादरम्यान विविध क्षेत्रांतील मान्यवरांचा सन्मान करण्यात आला. यामध्ये भाजपा राज्य उपाध्यक्ष अतुल काळसेकर, गोवा युवा मोर्चा अध्यक्ष तुषार केळकर, सचिव केणी, जिल्हा परिषद सदस्य श्वेता धरणे, माजी तालुकाध्यक्ष रंगनाथ गवस, सभापती पार्वती गवस, पंचायत समिती सदस्य संजय सातार्डेकर, सदस्या सोनाली नाईक, पराशर सावंत आणि डॉ. बाबासाहेब राणे यांचा समावेश होता. नगराध्यक्ष चेतन चव्हाण व जिल्हा परिषद सदस्य दीपक गवस यांनी विशाल परब यांना वाढदिवसाच्या शुभेच्छा देत अशा जनहितार्थ उपक्रमाबद्दल त्यांचे विशेष आभार मानले.
कार्यक्रमाच्या प्रारंभी माजी तालुकाध्यक्ष रंगनाथ गवस यांनी प्रास्ताविकातून शिबिरामागील भूमिका मांडली, तर संपूर्ण कार्यक्रमाचे सूत्रसंचालन निलेश गुरव यांनी केले. सर्वसामान्यांच्या आरोग्याची काळजी घेणारा हा उपक्रम दोडामार्ग तालुक्यात विशेष लक्षवेधी ठरला असून, वाढदिवसाच्या निमित्ताने प्रत्यक्ष सेवेचा नवा आदर्श या उपक्रमातून समोर आला आहे.
