शेतमालाला हक्काची बाजारपेठ, रास्त दर आणि आधुनिक कृषी तंत्रज्ञानावर भर; जि. प. अध्यक्ष प्रमोद कामत, युवा नेते विशाल परब यांच्यासह मान्यवरांची प्रमुख उपस्थिती
सावंतवाडी,दि.१२: शेतकऱ्यांच्या कष्टाला योग्य मोल, घामाला समृद्धीचे फळ आणि कृषी उत्पादनाला हक्काची हमी देणारी बाजारपेठ मिळाली तरच ग्रामीण अर्थव्यवस्थेला खरी गती मिळेल. शेतकऱ्यांच्या हातामध्ये मुबलक उत्पादनाचे सामर्थ्य आहे, मात्र त्या उत्पादनाला योग्य मोबदला मिळवून देण्यासाठी सक्षम विपणन व्यवस्था, आधुनिक तंत्रज्ञान आणि विश्वासार्ह मार्गदर्शनाची नितांत गरज आहे, असे प्रतिपादन जिल्हा परिषद अध्यक्ष प्रमोद कामत यांनी येथे केले. बांदा येथे ‘कृषकव्हेंचर प्रोड्युसर कंपनी लिमिटेड’च्या नूतन कार्यालयाच्या उद्घाटनप्रसंगी ते बोलत होते. या कार्यालयाचे उद्घाटन जिल्हा परिषद अध्यक्ष प्रमोद कामत यांच्या हस्ते फीत कापून, तर भाजप युवा नेते विशाल परब यांच्या हस्ते श्रीफळ वाढवून उत्साहात करण्यात आले.
शेतकऱ्यांच्या हिताचा ध्यास आणि आर्थिक स्वावलंबन
या उद्घाटन सोहळ्यात बोलताना भाजप युवा नेते विशाल परब यांनी कृषकव्हेंचरच्या उद्दिष्टांचे कौतुक केले. शेतकऱ्यांच्या विविध समस्यांची सोडवणूक करणे, उत्पादित शेतमालाचे काटेकोर नियोजन करणे आणि थेट बाजारपेठेत चांगला दर मिळवून देण्याच्या उद्देशाने दयानंद कुबल यांनी या कंपनीची स्थापना केली असल्याचे त्यांनी नमूद केले. शेतकऱ्यांना केवळ उत्पादनापुरते मर्यादित न ठेवता त्यांच्या मालाच्या विक्रीसाठी भक्कम साखळी उभी करणे, त्यांना आर्थिकदृष्ट्या स्वावलंबी बनविणे आणि शेतीतून शाश्वत नफा मिळवून देणे हा या उपक्रमाचा मुख्य हेतू आहे. हा उपक्रम भविष्यात संपूर्ण कोकणात विस्तारून हजारो शेतकऱ्यांना समृद्धीच्या मार्गावर नेईल, असा विश्वासही परब यांनी यावेळी व्यक्त केला.
बाजारपेठेपासून तंत्रज्ञानापर्यंत बहुआयामी पाठबळ
शेतकऱ्यांनी घाम गाळून पिकविलेल्या मालाला योग्य भाव मिळवून देणे ही त्यांच्या आर्थिक प्रगतीची पहिली पायरी मानून ही कंपनी प्रत्यक्ष खरेदी आणि सक्षम बाजारपेठ उपलब्ध करून देण्यावर लक्ष केंद्रित करणार आहे. यासोबतच आधुनिक शेती तंत्रज्ञान, तज्ज्ञांचे कृषी मार्गदर्शन, विविध शासकीय योजनांचा थेट लाभ मिळवून देणे आणि दर्जेदार रोपे, निविष्ठा व आधुनिक अवजारे पुरविणे यांसारख्या सेवा एकाच छताखाली उपलब्ध करून दिल्या जाणार आहेत. कृषी उत्पादनाची गुणवत्ता उंचावणे, उत्पादकतेत वाढ करणे आणि शेतकऱ्यांचे उत्पन्न दुप्पट करण्याच्या दृष्टीने हे कार्यालय बांदा परिसरातील शेती क्षेत्राला नवी दिशा देणारे ठरेल, असा सूर यावेळी उमटला.
या दिमाखदार सोहळ्यास सावंतवाडीचे उपनगराध्यक्ष अॅड. अनिल निरवडेकर, जिल्हा परिषद सदस्य नितीन राऊळ, बांदा पंचायत समिती सदस्या ऋतिका नाईक, तांबोळी पंचायत समिती सदस्या प्रियांका देसाई, माजी जि. प. सदस्या तथा भाजप महिला जिल्हाध्यक्षा श्वेता कोरगावकर, माजी उपसरपंच जावेद खतिब, भाजप बांदा मंडळ अध्यक्ष मधुकर देसाई, कोकण कला व शिक्षण विकास संस्थेचे अध्यक्ष दयानंद कुबल, वाफोलीचे उपसरपंच विनेश गवस, कासचे सरपंच प्रवीण पंडित, डिंगणेचे माजी उपसरपंच जयेश सावंत, समर्थ नर्सरीचे अर्जुन मोरजकर, प्रवीण देसाई यांच्यासह बांदा पंचक्रोशीतील शेतकरी, सामाजिक व राजकीय क्षेत्रातील मान्यवर मोठ्या संख्येने उपस्थित होते.
