१७ सप्टेंबर ते ७ ऑक्टोबर दरम्यान ‘सेवा संकल्प अभियान’; विविध विकासकामांचे अभिनंदन अन् राजकीय प्रस्ताव होणार मांडणार
सावंतवाडी,दि.०५: भारतीय जनता पक्षाची विस्तारित जिल्हा कार्यकारिणी बैठक सोमवारी, ९ सप्टेंबर रोजी सावंतवाडी येथील नगर परिषदेच्या बॅरिस्टर नाथ पै सभागृहात आयोजित करण्यात आली आहे. या बैठकीला भाजप प्रदेशाध्यक्ष रवींद्र चव्हाण, खासदार नारायण राणे, पालकमंत्री नितेश राणे यांच्यासह पक्षाचे प्रमुख पदाधिकारी उपस्थित राहणार आहेत, अशी माहिती भाजप जिल्हाध्यक्ष प्रभाकर सावंत यांनी आज पत्रकार परिषदेत दिली. या कार्यकारिणी बैठकीला सुमारे ४०० हून अधिक कार्यकर्ते आणि पदाधिकारी उपस्थित राहणार असल्याचेही त्यांनी सांगितले.
पुणे येथे नुकतीच भाजपची प्रदेश कार्यकारिणी बैठक ४ हजारहून अधिक कार्यकर्त्यांच्या उपस्थितीत पार पडली. त्यानंतर आता सावंतवाडीत ही महत्त्वाची जिल्हा कार्यकारिणी बैठक होत आहे. या बैठकीला प्रदेशाध्यक्ष रवींद्र चव्हाण, खासदार नारायण राणे, पालकमंत्री नितेश राणे यांच्यासोबतच आमदार निरंजन डावखरे,आमदार ज्ञानेश्वर म्हात्रे,आमदार प्रमोद जठार, अतुल काळसेकर, जिल्हा कार्यकारिणी सदस्य, मंडळ कार्यकारिणी पदाधिकारी आणि विविध लोकप्रतिनिधी मोठ्या संख्येने उपस्थित राहणार आहेत. या बैठकीत केंद्र आणि राज्य सरकारने केलेल्या विविध विकासकामांबद्दल अभिनंदन ठराव मंजूर करण्यात येणार असून, त्यानंतर महत्त्वाचा राजकीय प्रस्तावही मांडला जाणार आहे.
पंतप्रधान नरेंद्र मोदी यांची मुख्यमंत्री ते पंतप्रधान म्हणून २५ वर्षांची यशस्वी राजकीय कारकीर्द पूर्ण झाल्याच्या पार्श्वभूमीवर पंधरवड्याहून अधिक काळ विशेष अभियान राबवले जाणार आहे. १७ सप्टेंबर ते ७ ऑक्टोबर या कालावधीत ‘सेवा संकल्प अभियान’ राबवले जाणार असून, या अभियानाची सविस्तर रूपरेषा आणि नियोजन या कार्यकारिणी बैठकीत ठरवले जाणार असल्याचे जिल्हाध्यक्ष प्रभाकर सावंत यांनी स्पष्ट केले.
या पत्रकार परिषदेला भाजप महिला जिल्हाध्यक्षा श्वेता कोरगावकर, जिल्हा परिषद सदस्य संदीप गावडे, जिल्हा सरचिटणीस महेश सारंग, सहकार आघाडीचे जिल्हा संयोजक रवि मडगावकर, उपनगराध्यक्ष ॲड. अनिल निरवडेकर, पंचायत समिती उपसभापती गौरव मुळीक, तालुका मंडळ अध्यक्ष संतोष राऊळ, वेंगुर्ले तालुका मंडळ अध्यक्ष पप्पू परब, शहर मंडळ अध्यक्ष सुधीर आडिवरेकर, नगरसेवक ॲड. सिद्धार्थ भांबुरे, माजी सभापती पंकज पेडणेकर, पंचायत समिती सदस्य महेश धुरी, दिलीप भालेकर आणि सागर ढोकरे यांच्यासह पक्षाचे अन्य पदाधिकारी उपस्थित होते.
