अध्यक्ष मनीष दळवी यांची माहिती; विजेत्या संस्थांचा ऑक्टोबरमध्ये भव्य मेळाव्यात होणार सत्कार
सिंधुदुर्गनगरी, दि.०४: सिंधुदुर्ग जिल्ह्यात दूध उत्पादनाला चालना मिळावी आणि दुग्ध व्यावसायिक संस्था अधिक सक्षम व्हाव्यात या उद्देशाने सिंधुदुर्ग जिल्हा बँकेच्या वतीने आयोजित करण्यात आलेल्या ‘आदर्श दूध सहकारी संस्था’ स्पर्धेचा निकाल अखेर जाहीर झाला आहे. या स्पर्धेत सावंतवाडी तालुक्यातील बांदा पंचक्रोशी सहकारी दुग्ध व्यावसायिक संस्थेने संपूर्ण जिल्ह्यात प्रथम क्रमांक पटकावून अव्वल स्थान मिळवले आहे. जिल्हा बँकेचे अध्यक्ष मनीष दळवी यांनी सिंधुदुर्गनगरी येथील छत्रपती शिवाजी महाराज सभागृहात आयोजित पत्रकार परिषदेत ही माहिती दिली. जिल्ह्यातील सर्व विजेत्या दूध संस्थांचा लवकरच एका विशेष सोहळ्यात गौरव करण्यात येणार असल्याचे त्यांनी यावेळी स्पष्ट केले.
जिल्ह्यातील १४१ दूध पुरवठा करणाऱ्या संस्थांमधून व्यवस्थापन, आर्थिक शिस्त, पारदर्शक कारभार, डिजिटल व्यवहारांचा वापर, दूध संकलनातील वाढ, सभासद सेवा आणि शासकीय योजनांची प्रभावी अंमलबजावणी या विविध निकषांच्या आधारे प्रस्ताव मागवण्यात आले होते. ३० ऑगस्ट २०२६ पर्यंत प्राप्त झालेल्या ३० प्रस्तावांमधून तज्ज्ञांमार्फत विजेत्या संस्थांची निवड करण्यात आली.
या स्पर्धेत सावंतवाडी तालुक्यातील बांदा पंचक्रोशी संस्थेने ५० हजार रुपयांचे प्रथम पारितोषिक पटकावले. द्वितीय क्रमांकाचे ३० हजार रुपयांचे पारितोषिक इन्सुली सहकारी दुग्ध संस्था आणि मडुरा येथील श्री देवी माऊली सहकारी दुग्ध संस्था यांना संयुक्तपणे जाहीर झाले आहे. तृतीय क्रमांकाचे २० हजार रुपयांचे पारितोषिक कुडाळ तालुक्यातील घावनळे येथील मयुर दुग्ध संस्था आणि वर्दे येथील यशोदा दुग्ध संस्था यांना विभागून देण्यात आले, तर वेंगुर्ला तालुक्यातील वेतोरे येथील श्री सातेरी प्रासादिक विकास संस्थेला १० हजार रुपयांचे उत्तेजनार्थ पारितोषिक मिळाले आहे.
ऑक्टोबर २०२६ च्या पहिल्या आठवड्यात जिल्ह्यातील सर्व दुग्ध संस्थांचा एक भव्य मेळावा आयोजित केला जाणार असून, या मेळाव्यात विजेत्या संस्थांना त्यांच्या गरजेनुसार वस्तूरूप अथवा साहित्य स्वरूपात बक्षीस आणि प्रशस्तीपत्र देऊन गौरवले जाईल. जिल्ह्याबाहेरून नवीन जनावरांची खरेदी केल्यास स्थानिक पातळीवर दुग्ध उत्पादनात मोठी वाढ होईल, असा विश्वास व्यक्त करत पुढील वर्षी या स्पर्धेत जास्तीत जास्त संस्थांनी सहभागी व्हावे, असे आवाहन अध्यक्ष मनीष दळवी यांनी केले.
या पत्रकार परिषदेस बँकेचे संचालक महेश सारंग,व्हिक्टर डान्टस, सौ. नीता राणे, रवींद्र मडगावकर, बँकेचे मुख्य कार्यकारी अधिकारी अनिरुद्ध देसाई, उपमुख्य कार्यकारी अधिकारी प्रमोद गावडे तसेच भगीरथ प्रतिष्ठानचे डॉ. प्रसाद देवधर आदी मान्यवर उपस्थित होते.
