युवा रक्तदाता संघटना व मित्रपरिवाराचा पुढाकार; राजवाडा बॅन्क्वेट हॉल येथे भाविकांनी लाभ घेण्याचे आवाहन
सावंतवाडी,दि.३०: सावंतवाडीकरांचे श्रद्धास्थान आणि आराध्य दैवत श्री देव पाटेकर यांच्या चरणी सालाबादप्रमाणे या वर्षीही श्रावण महिन्याचे औचित्य साधून विशेष सेवा अर्पण करण्यात येत आहे. श्रावणी सोमवारच्या निमित्ताने युवा रक्तदाता संघटना आणि समस्त मित्रपरिवार यांच्या संयुक्त विद्यमाने तिसऱ्या श्रावणी सोमवारी सर्व भाविक भक्तांसाठी भव्य महाप्रसादाचे आयोजन करण्यात आले आहे.
हा महाप्रसादाचा कार्यक्रम सोमवार, दिनांक ३१ ऑगस्ट २०२६ रोजी दुपारी १२ ते २ या वेळेत शहरातील ‘राजवाडा बॅन्क्वेट’ हॉल येथे पार पडणार आहे. सावंतवाडी परिसरातील तसेच दूरवरून येणाऱ्या सर्व शिवभक्तांनी आणि भाविकांनी या महाप्रसादाचा लाभ घ्यावा, असे नम्र आवाहन आयोजकांच्या वतीने करण्यात आले आहे.
या उपक्रमासाठी सावंतवाडी संस्थानचे युवराज लखमराजे बाळराजेसाहेब सावंत भोसले व त्यांच्या संपूर्ण कुटुंबीयांचे विशेष सहकार्य लाभले असून आयोजकांनी त्यांचे विशेष आभार व्यक्त केले आहेत. सामाजिक बांधिलकी जपत दरवर्षीप्रमाणे यंदाही हा धार्मिक व सामाजिक उपक्रम मोठ्या उत्साहात पार पडणार असून युवा रक्तदाता संघटनेचे अध्यक्ष तथा नगरसेवक देव्या सूर्याजी यांच्यासह सर्व सदस्यांनी भाविकांना उपस्थित राहण्याचे निमंत्रण दिले आहे.
