सावंतवाडी तालुक्यात सामाजिक भान जपणारा उपक्रम; विद्यार्थ्यांमध्ये देशप्रेमाची भावना रुजवण्यासाठी मुख्याध्यापक राहुल समुद्रे यांचा पुढाकार
सावंतवाडी,दि.३०: तालुक्यातील शिरशिंगे येथील श्रीदेवी पावणाई रवळनाथ विद्यामंदिरात रक्षाबंधनाचे औचित्य साधून देशाचे रक्षण करणाऱ्या माजी सैनिकांबद्दल आदर व्यक्त करत अनोखा उपक्रम राबवण्यात आला. शाळेतील आठवी, नववी आणि दहावीच्या विद्यार्थ्यांनी स्वतः तयार केलेल्या राख्या माजी सैनिकांना बांधून रक्षाबंधन साजरे केले. याच वेळी प्रशालेच्या प्राणांगणातील वृक्षांनाही राख्या बांधून विद्यार्थी, शिक्षक आणि माजी सैनिकांनी 
वृक्ष संवर्धनाचा अत्यंत महत्त्वपूर्ण संदेश दिला.
सीमेवर अहोरात्र डोळ्यात तेल घालून पहारा देणाऱ्या सैनिकांमुळेच आपण देशात सुरक्षित आणि सुखाने जगू शकतो. ज्या माजी सैनिकांनी आपल्या आयुष्यातील मोलाचा काळ देशसेवेसाठी समर्पित केला, त्यांच्याप्रती कृतज्ञता व्यक्त व्हावी आणि विद्यार्थ्यांमध्ये सैनिकांबद्दल आस्था व अभिमान निर्माण व्हावा, या उद्देशाने या कार्यक्रमाचे आयोजन करण्यात आल्याचे मुख्याध्यापक राहुल समुद्रे यांनी सांगितले.
या वेळी उपस्थित माजी सैनिक तथा गावचे सरपंच दीपक राऊळ यांनी विद्यार्थ्यांशी संवाद साधताना मोबाईलच्या अतिवापरापासून दूर राहण्याचे आवाहन केले. मुलांनी स्वतःच्या फिटनेसकडे लक्ष द्यावे, केवळ अभ्यासापुरताच मोबाईलचा वापर करावा आणि शिक्षकांच्या मार्गदर्शनाचे तंतोतंत पालन करावे, असा मोलाचा सल्ला त्यांनी दिला. तर माजी सैनिक संजय राऊळ यांनी ‘जय जवान, जय किसान’चा नारा देत देश आणि शेतकऱ्यांबद्दल आदर व्यक्त केला. त्यांच्या ‘भारत माता की जय’ आणि ‘वंदे मातरम’च्या घोषणांनी शाळा परिसर दुमदुमून गेला होता.
या कार्यक्रमाला प्रमुख पाहुणे म्हणून माजी सैनिक चंद्रकांत राऊळ, नारायण राऊळ, शांताराम राऊळ, दीपक राऊळ आणि मुख्याध्यापक राहुल समुद्रे व्यासपीठावर उपस्थित होते. कार्यक्रमाचे सूत्रसंचालन सुमन राऊळ यांनी केले, तर आभार सायली परब यांनी मानले. या प्रसंगी शिक्षिका सौ. संध्या पवार, शिक्षकेतर कर्मचारी संतोष राणे, विठ्ठल धोंड, आबा डोईफोडे, संदीप जाधव, शरयू धोंड यांच्यासह ग्रामस्थ आणि माजी सैनिक मोठ्या संख्येने उपस्थित होते.
