कोलगाव येथे शाल व पुष्पगुच्छ देऊन गौरव;हिंदू-मुस्लिम बांधवांनी एकत्र येत व्यक्त केला अभिमान
सावंतवाडी,दि.२९: क्रीडा व युवक सेवा संचालनालय, महाराष्ट्र शासन अंतर्गत जिल्हा क्रीडा अधिकारी कार्यालय, सिंधुदुर्ग यांच्यावतीने सामाजिक कार्य, शैक्षणिक उपक्रम, स्वच्छता मोहीम, क्रीडा स्पर्धा आणि रक्तदान शिबिर यांसारख्या विविध सामाजिक उपक्रमांमध्ये उल्लेखनीय योगदान दिल्याबद्दल सावंतवाडी तालुक्यातील फिजा मकानदार (जिल्हा युवती पुरस्कार) व जयराम जाधव (जिल्हा युवा पुरस्कार) तसेच ‘कोकण कला व शिक्षण विकास संस्था, सिंधुदुर्ग’ यांना नुकतेच पुरस्कार प्रदान करण्यात आले होते.
स्वातंत्र्यदिनी (१५ ऑगस्ट) राज्याचे मत्स्यव्यवसाय व बंदरे मंत्री तथा सिंधुदुर्ग जिल्ह्याचे पालकमंत्री नितेश राणे यांच्या शुभहस्ते हे पुरस्कार प्रदान करण्यात आले.
आपल्या समाजातील एका युवतीने आणि सहकाऱ्याने जिल्ह्याच्या पालकमंत्र्यांच्या हस्ते १५ ऑगस्ट रोजी हा महत्त्वपूर्ण बहुमान पटकावला, याचा विशेष अभिमान बाळगत शुक्रवारी कोलगाव येथे मुस्लिम समाजाच्या वतीने एका विशेष कार्यक्रमाचे आयोजन करण्यात आले होते. या कार्यक्रमात फिजा मकानदार आणि जयराम जाधव यांचा शाल व पुष्पगुच्छ देऊन भावूक व उत्साहपूर्ण वातावरणात नागरी सत्कार करण्यात आला.
या सत्कार समारंभाला कोलगाव मुस्लिम कमिटीचे अध्यक्ष लियास शेख, उपाध्यक्ष सलाम शेख, माजी ग्रामपंचायत सदस्य सलमा बेगम शेख ,नाझिया शेख, पार्वती शेट्टी, हसीना जकात, आल्मास शेख, मंगला वडार, प्रियांका दळवी, स्वप्नाली घाटकर, अस्मिता परब, नसीम मकानदार, नासिर मकानदार, रोहित पेडणेकर, भाविका कदम आदी हिंदू-मुस्लिम बांधव व नागरिक मोठ्या संख्येने उपस्थित राहून या सोहळ्याचे साक्षीदार झाले. या कार्यक्रमाने परिसरातील सामाजिक सलोखा आणि बंधुभावाचे एक उत्तम उदाहरण समोर आणले आहे.
