सामाजिक आणि शैक्षणिक बांधिलकीतून १०० विद्यार्थी व कर्मचाऱ्यांना मदतीचा हात; प्रशालेला भविष्यातही सहकार्याची ग्वाही
सावंतवाडी,दि.२६: आरोंदा हायस्कूलमधील विद्यार्थी, शिक्षक आणि शिक्षकेतर कर्मचाऱ्यांना ‘राऊत आणि कंपनी’ तसेच ‘रो-वस्त्र’ यांच्या संयुक्त विद्यमाने छत्र्यांचे वाटप करण्यात आले. पावसाळ्याच्या पार्श्वभूमीवर सामाजिक दायित्वाच्या भावनेतून राबवण्यात आलेल्या या स्तुत्य उपक्रमांतर्गत प्रशालेतील सुमारे १०० विद्यार्थी, शिक्षक व कर्मचाऱ्यांना छत्र्यांचे वाटप करण्यात आले.
कार्यक्रमाची सुरुवात विद्यार्थ्यांनी सादर केलेल्या सुमधुर स्वागतगीताने झाली. यानंतर उपस्थित मान्यवरांचे प्रशालेच्या वतीने गुलाबपुष्प देऊन उत्साहात स्वागत करण्यात आले. या कार्यक्रमाच्या अध्यक्षस्थानी सुजाता परब लाभल्या होत्या.
याप्रसंगी आरोंदा पंचक्रोशी शिक्षण प्रसारक मंडळाचे अध्यक्ष संदेश परब, उपाध्यक्ष रघुनाथ (बबन) नाईक, रो-वस्त्रचे रोहन परब, सचिव वासुदेव (भाई) देऊलकर, खजिनदार रुपेश धर्णे, सदस्य रामचंद्र कोरगांवकर, स्नेहा गडेकर, ग्रामपंचायत आरोंदाच्या प्रशासक सायली साळगांवकर, स्मिताली नाईक, सुभद्रा नाईक, शिल्पा नाईक, नरेश देऊलकर, पालक-शिक्षक संघाच्या उपाध्यक्ष भाग्यश्री रेडकर, सदस्य गौरी नाईक, शिक्षणप्रेमी विद्याधर नाईक, सेवानिवृत्त शिक्षक बाळा आरोंदेकर, शांताराम परब, नयन चोडणकर व चंदन गोसावी आदी मान्यवर उपस्थित होते.
आपले मनोगत व्यक्त करताना संदेश परब म्हणाले की, राऊत आणि कंपनी तसेच रो-वस्त्र यांच्या माध्यमातून दरवर्षी विविध सामाजिक व शैक्षणिक उपक्रम राबविले जातात. त्याचाच एक भाग म्हणून यंदा आरोंदा हायस्कूलमधील विद्यार्थ्यांना छत्र्यांचे वाटप करण्यात आले आहे. भविष्यातही प्रशालेला अशाच प्रकारचे सर्वतोपरी सहकार्य करण्यात येईल, अशी ग्वाही देत त्यांनी शाळेच्या सर्वांगीण प्रगतीसाठी सर्वांनी एकत्र येऊन प्रयत्न करण्याचे आवाहन केले. यावेळी रो-वस्त्रचे रोहन परब यांनीही आपले विचार मांडून उपक्रमामागील भूमिका स्पष्ट केली.
सदर कार्यक्रमाचे नेटके सूत्रसंचालन सुप्रिया कोरगांवकर व शिक्षक ताराचंद राठोड यांनी केले, तर उपस्थितांचे आभार बाळा आरोंदेकर यांनी मानले. या कार्यक्रमास प्रशालेचे शिक्षक, पालक, ग्रामस्थ व शिक्षकेतर कर्मचारी मोठ्या संख्येने उपस्थित होते.
