कालपासून सुरू असलेल्या अथक रेस्क्यू ऑपरेशनला दुपारी १ वाजता यश; कुडाळ तालुक्यातील पिंगुळी भूपकरवाडीत नागरिकांची तुफान गर्दी
कुडाळ,दि.२५: तालुक्यातील पिंगुळी भूपकरवाडी येथील गणेशकोंडमध्Add Media Add Formये गेल्या २४ तासांपासून सुरू असलेला मगरीचा थरार अखेर संपुष्टात आला आहे. काल दुपारपासून धडकी भरवणारी ती भलीमोठी मगर आज दुपारी १ वाजता वनविभागाच्या बचाव पथकाने मोठ्या शिताफीने जाळ्यात पकडून जेरबंद केली. या यशस्वी कारवाईनंतर स्थानिक ग्रामस्थ आणि प्रशासनाने सुटकेचा निःश्वास सोडला आहे. पकडण्यात आलेल्या मगरीला पुढील प्रक्रियेसाठी कुडाळ वनविभागाच्या ताब्यात देण्यात आले आहे.
काल दुपारी गणेशकोंड परिसरात ही मगर आढळून आल्यानंतर परिसरात एकच खळबळ उडाली होती. घटनेची माहिती मिळताच वनविभाग सावंतवाडीचे जलद कृती दल (रेस्क्यू टीम), एमआयडीसी अग्निशामक सेवा, कुडाळ नगरपंचायत अग्निशामक सेवा तसेच पोलीस प्रशासन तातडीने घटनास्थळी दाखल झाले. या रेस्क्यू ऑपरेशनमध्ये स्थानिक ग्रामस्थांनीही मोलाचे सहकार्य केले. काल रात्री उशिरापर्यंत बचावकार्य सुरू होते, परंतु पाण्यात अचानक वाढ झाल्याने मगरीला पकडण्यात मोठे अडथळे निर्माण झाले होते.
अखेर आज सकाळपासून बचाव पथकाने पुन्हा नव्या जिद्दीने मोहीम हाती घेतली. सलग चाललेल्या प्रयत्नांना दुपारी १ च्या सुमारास यश आले आणि जलद कृती दलाने मोठ्या कौशल्याने जाळीचा वापर करून मगरीला सुरक्षितपणे बाहेर काढले. या संपूर्ण कारवाईदरम्यान वनविभागाचे वरिष्ठ अधिकारी प्रत्यक्ष उपस्थित होते. दरम्यान, या प्रचंड आकाराच्या मगरीला पाहण्यासाठी आसपासच्या परिसरातील नागरिकांनी मोठी गर्दी केली होती.
