उद्धव ठाकरे यांच्या वाढदिवसानिमित्त वेत्ये येथे गाऱ्हाणे आणि शालेय साहित्य वाटप; सामाजिक उपक्रमांनी वाढदिवस साजरा
सावंतवाडी,दि.२७ : स्वर्गीय हिंदुहृदयसम्राट बाळासाहेब ठाकरे यांनी दिलेला “८० टक्के समाजकारण आणि २० टक्के राजकारण” हा विचार आजही शिवसैनिकांच्या कार्याचा मार्गदर्शक आहे. संघर्षाच्या काळातही पक्षप्रमुख उद्धव बाळासाहेब ठाकरे यांच्या पाठीशी निष्ठेने उभे राहिलेले शिवसैनिक समाजहिताची परंपरा अखंडपणे पुढे नेत आहेत. संघर्ष हा कायमस्वरूपी नसतो; मात्र समाजासाठी सातत्याने काम करणाऱ्यांनाच यश मिळते. केवळ राजकारण न करता सामाजिक बांधिलकी जपत समाजकारण केल्यास यश निश्चित मिळते, असे प्रतिपादन वेत्येचे युवा व आदर्श सरपंच गुणाजी गावडे यांनी केले.
शिवसेना (उद्धव बाळासाहेब ठाकरे) पक्षाच्या वतीने पक्षप्रमुख उद्धव ठाकरे यांच्या वाढदिवसानिमित्त वेत्ये येथे विविध सामाजिक उपक्रमांचे आयोजन करण्यात आले होते. यावेळी आयोजित कार्यक्रमात मुख्य अतिथी म्हणून ते बोलत होते.
वाढदिवसाच्या औचित्य साधून वेत्ये येथील प्रसिद्ध श्री देव कलेश्वर मंदिरात नारळ व पेढे अर्पण करून मालवणी परंपरेनुसार गाऱ्हाणे घालण्यात आले. पक्षप्रमुख उद्धव ठाकरे यांना उत्तम आरोग्य, दीर्घायुष्य लाभो आणि त्यांना निरोगी आयुष्य मिळावे, यासाठी सर्व शिवसैनिकांनी मंदिरात एकत्र येत सामूहिक प्रार्थना केली. या धार्मिक प्रसंगी सरपंच गुणाजी गावडे, ज्येष्ठ शिवसैनिक सुनील गावडे, बाळू परब, संतोष गावडे, गुरुदास गावकर यांच्यासह स्थानिक देवस्थानचे मानकरी मोठ्या संख्येने उपस्थित होते.
धार्मिक कार्यक्रमानंतर सामाजिक उपक्रमाचा भाग म्हणून श्री देव कलेश्वर विद्यामंदिर व जिल्हा परिषद प्राथमिक शाळेतील विद्यार्थ्यांना शालेय साहित्य आणि खाऊचे वाटप करण्यात आले. या कार्यक्रमाला ज्येष्ठ शिवसैनिक तथा माजी सभापती रमेश गावकर, ज्येष्ठ शिवसैनिक सुनील गावडे, पुंडलिक देऊलकर, संतोष गावडे, मुख्याध्यापक अरविंद सरनोबत यांच्यासह शाळेतील शिक्षक, विद्यार्थी, पालक आणि ग्रामस्थ मोठ्या संख्येने उपस्थित होते. दरवर्षीप्रमाणे यंदाही वेत्ये येथे राबवण्यात आलेल्या या समाजोपयोगी उपक्रमांचे आणि उपस्थितांच्या सामाजिक बांधिलकीचे संपूर्ण ग्रामस्थांकडून कौतुक करण्यात आले.
दरम्यान, या कार्यक्रमाचे दुसरे वैशिष्ट्य म्हणजे ज्येष्ठ शिवसैनिक सुनील गावडे यांचा वाढदिवसही याच दिवशी असल्याने उपक्रमात दुप्पट उत्साह पाहायला मिळाला. 
उपस्थित सर्व मान्यवरांनी सुनील गावडे यांचा शाल व श्रीफळ देऊन सत्कार केला आणि त्यांना वाढदिवसाच्या भरभरून शुभेच्छा दिल्या. तसेच त्यांच्याही उत्तम आरोग्य आणि दीर्घायुष्यासाठी श्री देव कलेश्वराच्या चरणी विशेष प्रार्थना करण्यात आली.
