२१ आजारांवर मोफत उपचार आणि शस्त्रक्रिया; शिवसेना जिल्हाप्रमुख संजू परब यांची पत्रकार परिषदेत माहिती
सावंतवाडी, दि.१५: सावंतवाडी विधानसभा मतदारसंघाचे आमदार आणि माजी मंत्री दीपक केसरकर यांच्या वाढदिवसाचे औचित्य साधून सावंतवाडीत आठवडाभर विविध सामाजिक उपक्रमांचे आयोजन करण्यात आले आहे. या उपक्रमांचाच एक भाग म्हणून येत्या २० जुलै रोजी येथील उपजिल्हा रुग्णालयात भव्य मोफत ‘महाआरोग्य शिबिरा’चे आयोजन करण्यात आले आहे. के. एल. ई. विद्यापीठ संचलित डॉ. प्रभाकर कोरे हॉस्पिटल व मेडिकल रिसर्च सेंटर बेळगाव, प्रशिक्षण संस्था सिंधुदुर्ग आणि दीपक केसरकर मित्रमंडळ यांच्या संयुक्त विद्यमाने हे शिबिर पार पडणार आहे. या शिबिरामध्ये तब्बल २१ विविध गंभीर व सर्वसामान्य आजारांवर मोफत उपचार व शस्त्रक्रिया केली जाणार असून, मतदारसंघातील जास्तीत जास्त गरजूंनी आणि नागरिकांनी या सुवर्णसंधीचा लाभ घ्यावा, असे आवाहन शिवसेना जिल्हाप्रमुख संजू परब यांनी केले आहे. सावंतवाडी येथील आयोजित पत्रकार परिषदेत ते बोलत होते.
या महाआरोग्य शिबिराचे स्वरूप अत्यंत व्यापक असून, हे शिबिर २० जुलै रोजी सकाळी १० ते सायंकाळी ५ या वेळेत उपजिल्हा रुग्णालयाच्या आवारात संपन्न होईल. बेळगाव येथील तज्ज्ञ डॉक्टरांच्या उपस्थितीत हृदयरोग व हृदय शस्त्रक्रिया, सामान्य शस्त्रक्रिया, पचन संस्था व पोटाचे रोग, फिजिओथेरपी, स्त्रीरोग व प्रसुती, नेत्ररोग, ईसीजी, मेंदू व मज्जासंस्था शस्त्रक्रिया, छाती व श्वसन रोग, कान-नाक-घसा, कर्करोग तपासणी, बालरोग, त्वचारोग, टू-डी इको आणि मधुमेह यांसारख्या २१ आजारांवर मोफत उपचार व आवश्यकतेनुसार शस्त्रक्रिया केल्या जातील. आमदार केसरकर यांच्या वाढदिवसानिमित्त केवळ शिबीरच नव्हे, तर संपूर्ण आठवडाभर विविध लोकोपयोगी उपक्रम राबवले जाणार आहेत. १८ जुलै रोजी सकाळी आमदार केसरकर यांच्या जनसंपर्क कार्यालयात केक कापून वाढदिवस साजरा केला जाईल. त्यानंतर तिन्ही तालुक्यांतील उपजिल्हा रुग्णालयांमध्ये रुग्णांना फळ वाटप, युवा रक्तदाता संघटनेच्या वतीने रक्तदान शिबिर, गरजू विद्यार्थ्यांना वह्यांचे वाटप आणि गरीब कुटुंबांना धान्य वाटप केले जाणार आहे. तसेच क्रीडाप्रेमींसाठी १९ जुलै रोजी भव्य कबड्डी स्पर्धेचे आयोजन करण्यात आले आहे.
याच सामाजिक उपक्रमांतर्गत महिला आघाडीच्या वतीनेही विशेष कार्यक्रमांचे आयोजन करण्यात आले आहे. महिला जिल्हाप्रमुख ॲड. निता कविटकर यांनी दिलेल्या माहितीनुसार, तिन्ही तालुक्यांमध्ये महिला पदाधिकारी व कार्यकर्त्यांच्या माध्यमातून गरजू महिला व नागरिकांना फळ आणि छत्र्यांचे वाटप केले जाणार आहे. आमदार दीपक केसरकर यांचा वाढदिवस हा कोणत्याही भपक्याशिवाय केवळ विधायक आणि सामाजिक उपक्रमांनीच साजरा केला जाईल, असे त्यांनी यावेळी स्पष्ट केले. या पत्रकार परिषदेप्रसंगी शिवसेना जिल्हाप्रमुख संजू परब, जिल्हा परिषद सदस्य कवठणकर, महिला जिल्हाप्रमुख ॲड. निता कविटकर, नगरसेवक देव्या सुर्याजी, नगरसेविका ॲड. सायली दुभाषी, स्नेहा नाईक, भारती मोरे यांच्यासह इतर अनेक पदाधिकारी व कार्यकर्ते मोठ्या संख्येने उपस्थित होते.
