शाळेच्या ऋणांतून अंशतः उतराई होण्यासाठी घेतला पुढाकार; प्रशालेकडून शाल-श्रीफळ देऊन विशेष सत्कार
सावंतवाडी, दि.१४ : ग्रामीण भागातील विद्यार्थ्यांना दर्जेदार शिक्षण देऊन त्यांचे भविष्य घडवणाऱ्या कलंबिस्त इंग्लिश स्कूल (हायस्कूल) चे माजी विद्यार्थी आणि ठाणे लघु-पाटबंधारे विभागाचे सेवानिवृत्त शाखा अभियंता रमेश अर्जुन कदम यांनी शाळेप्रती आपली कृतज्ञता व्यक्त केली आहे. त्यांनी नुकतीच प्रशालेला स्नेहभेट देऊन शाळेच्या शैक्षणिक व भौतिक विकासासाठी रोख १ लाख रुपयांची भरघोस देणगी सुपूर्द केली. त्यांच्या या दातृत्वाबद्दल प्रशालेच्या वतीने त्यांचा शाल, श्रीफळ आणि पुष्पगुच्छ देऊन भावपूर्ण सत्कार करण्यात आला.
या प्रसंगी विद्यार्थ्यांशी आणि शिक्षक वर्गाशी संवाद साधताना रमेश कदम कमालीचे भावूक झाले होते. आपल्या यशाचे श्रेय शाळेला देताना ते म्हणाले की, या शाळेचे आपल्यावर खूप मोठे ऋण आहेत. तत्कालीन परिस्थितीत ग्रामीण भागात अशा प्रकारची उत्तम शिक्षणाची सुविधा उपलब्ध असल्यानेच आपल्याला उच्च दर्जाचे शिक्षण घेता आले. त्यांनी आपल्या जुन्या आठवणींना उजाळा देत सांगितले की, शैक्षणिक वर्ष १९८७-८८ मध्ये ते या शाळेतून इयत्ता दहावीच्या परीक्षेत प्रथम क्रमांकाने उत्तीर्ण झाले होते. याच शाळेत शिकत असताना त्यांनी ड्रॉइंग ग्रेडच्या एलिमेंटरी आणि इंटरमिजिएट परीक्षाही उत्तम श्रेणीत उत्तीर्ण केल्या होत्या. या कला परीक्षांचा त्यांना करिअरच्या सुरुवातीला मोठा फायदा झाला.
आपल्या शासकीय सेवेतील प्रवासाबाबत बोलताना कदम यांनी सांगितले की, ड्रॉइंग परीक्षेच्या पात्रतेमुळेच त्यांची कोकण निवड मंडळाच्या भरती प्रक्रियेतून ‘अनुरेखक’ (सिव्हिल ड्राफ्ट्समन) या पदावर निवड झाली आणि १९९२ मध्ये ते ठाणे जिल्हा परिषदेत शासकीय सेवेत रुजू झाले. त्यानंतर आपल्या कौशल्याच्या जोरावर स्थापत्य अभियंता आणि पुढे लघु पाटबंधारे विभाग, ठाणे येथे ‘शाखा अभियंता’ म्हणून तब्बल ३३ वर्षे यशस्वी सेवा बजावून ते सेवानिवृत्त झाले. या संपूर्ण प्रवासात प्रशालेतील शिक्षकांचे मार्गदर्शन आणि संस्थाचालकांचे सहकार्य अत्यंत मोलाचे ठरल्याचे त्यांनी कृतज्ञतापूर्वक नमूद केले.
उपस्थित विद्यार्थ्यांना मार्गदर्शन करताना त्यांनी, केवळ पुस्तकी किडा न बनता विद्यार्थ्यांनी अभ्यासासोबतच कला आणि क्रीडा क्षेत्रातील कौशल्ये आत्मसात करून स्वतःचा सर्वांगीण व्यक्तिमत्त्व विकास साधावा, असा मोलाचा सल्ला दिला. शहरी भागातील शाळांच्या तुलनेत कलंबिस्त हायस्कूल ही ग्रामीण भागात अतिशय दर्जेदार आणि उपक्रमशील शिक्षण देणारी शाळा आहे, अशा शब्दांत त्यांनी प्रशालेचा गौरव केला.
श्री. कदम यांनी दाखवलेल्या या दातृत्वाबद्दल आणि शाळेप्रती असलेल्या आदरा बद्दल संस्थेचे अध्यक्ष शिवाजी सावंत, सचिव यशवंत राऊळ, सहसचिव चंद्रकांत राणे यांच्यासह सर्व संचालक मंडळ, मुख्याध्यापक अभिजीत जाधव, सर्व शिक्षक-शिक्षकेतर कर्मचारी आणि विद्यार्थ्यांनी त्यांचे मनःपूर्वक आभार मानले व त्यांच्या पुढील भावी आयुष्यासाठी शुभेच्छा दिल्या.
