२२८ कोटींच्या ठेवींचा टप्पा पार करणारी नामांकित संस्था आता कोकणवासीयांच्या सेवेत; उद्घाटनानिमित्त विविध क्षेत्रांतील मान्यवरांचा सत्कार.
सावंतवाडी, दि.३१: महाराष्ट्र आणि कर्नाटक या दोन्ही राज्यांमध्ये आपल्या पारदर्शक कारभाराने ग्राहकांच्या गळ्यातील ताईत बनलेली ‘साईनाथ मल्टीस्टेट को-ऑपरेटिव्ह क्रेडिट सोसायटी लिमिटेड’ आता सिंधुदुर्ग जिल्ह्याच्या आर्थिक विकासाला हातभार लावण्यासाठी सज्ज झाली आहे. २२८ कोटी रुपयांच्या ठेवींचा टप्पा यशस्वीपणे पार करणाऱ्या या नामांकित संस्थेच्या नव्या शाखेचा सावंतवाडी येथे अत्यंत दिमाखदार सोहळ्यात शुभारंभ करण्यात आला. या विस्तारामुळे जिल्ह्यातील ग्राहक, सभासद आणि ठेवीदारांना अधिक सक्षम, आधुनिक आणि विश्वासार्ह आर्थिक सेवा घरबसल्या उपलब्ध होणार आहेत. सावंतवाडी शहरातील सृष्टी इम्पेरिया, बाजारपेठ येथे आयोजित या नूतन शाखेचा भव्य उद्घाटन सोहळा विविध क्षेत्रांतील मान्यवरांच्या उपस्थितीत संपन्न झाला. या मंगलप्रसंगी शाखेत श्री सत्यनारायण महापूजेचे आयोजन करण्यात आले होते. या धार्मिक आणि चैतन्यमय वातावरणात पार पडलेल्या सोहळ्याला सावंतवाडीकर नागरिकांनी आणि व्यापाऱ्यांनी उत्स्फूर्त गर्दी केली होती.
यावेळी उपस्थितांशी संवाद साधताना संस्थेचे संस्थापक अध्यक्ष उत्तम जाधव यांनी संस्थेच्या आजवरच्या यशस्वी वाटचालीचा आढावा घेतला. विश्वास, पारदर्शकता आणि ग्राहकाभिमुख सेवा या त्रिसूत्रीच्या बळावरच साईनाथ मल्टीस्टेटने आजवर प्रगती केली असल्याचे त्यांनी सांगितले. सभासद, ठेवीदार, पिग्मी खातेदार आणि ग्राहकांनी दाखविलेल्या अढळ विश्वासामुळेच आज संस्था २२८ कोटींच्या ठेवींचा टप्पा गाठू शकली, असे नमूद करत त्यांनी सावंतवाडीत शाखा सुरू करण्याचे स्वप्न आज पूर्ण झाल्याची भावना व्यक्त केली. तसेच लवकरच कर्नाटक राज्यातही नवीन शाखा सुरू होत असून, सिंधुदुर्गातील जनतेला सर्वोत्तम व दर्जेदार बँकिंग सेवा देण्यासाठी आम्ही कटिबद्ध आहोत, अशी ग्वाही त्यांनी दिली.
शाखा उद्घाटनाचे औचित्य साधून साईनाथ मल्टीस्टेटच्या वतीने सावंतवाडी आणि परिसरातील विविध क्षेत्रांमध्ये उल्लेखनीय योगदान देणाऱ्या व्यक्तिमत्त्वांचा विशेष सत्कार करण्यात आला. सामाजिक, शैक्षणिक, वैद्यकीय, पत्रकारिता या क्षेत्रांत अविरत कार्य करणाऱ्या मान्यवरांना सन्मानित करून संस्थेने आपली सामाजिक बांधीलकी जपली.
या भव्य सोहळ्याला राजकीय, सामाजिक आणि व्यावसायिक क्षेत्रातील दिग्गजांची मोठी उपस्थिती लाभली होती. यामध्ये राष्ट्रीय काँग्रेसच्या महिला जिल्हाध्यक्ष साक्षी वंजारी, सकल मराठा समाजाचे अध्यक्ष तथा संपादक सीताराम गावडे, माजी उपनगराध्यक्षा अन्नपूर्णा कोरगावकर, संचालक प्रा. डॉ. सुरेश चौगले, सामाजिक कार्यकर्त्या डॉ. वंदना करंबेळकर, डॉ. प्रवीणकुमार ठाकरे, डॉ. संदीप सावंत आणि डॉ. मृणाल सावंत प्रामुख्याने उपस्थित होते. त्यांच्या सोबतीला संचालक आनंदा कांबळे, विजय वारके, महेश पाटील, अमर कुंभार, एकनाथ घोरपडे, कृष्णात सुतार, विशाल भांदिगरे, उमेश जाधव यांच्यासह सामाजिक कार्यकर्ते रवी जाधव, आनंद ठोंबरे, शैलेश पै, शिवाजी शेडगे, नीरज देसाई, प्रा. रूपेश पाटील, संपादक आनंद धोंड, अमित परब, माहिती अधिकार पदाधिकारी सुशील चौगुले, प्रदीप प्रियोळकर व सातावळेकर उपस्थित होते. कार्यक्रम यशस्वी करण्यासाठी बिझनेस हेड अभिजीत संभाजी, सिनीयर मॅनेजर श्रीकांत हातकर आणि शाखा व्यवस्थापक शशांक विचारे यांच्यासह संस्थेचे सर्व अधिकारी व कर्मचारी कार्यरत होते.
सावंतवाडीतील या नव्या शाखेमुळे जिल्ह्यातील आर्थिक व्यवहारांना केवळ गतीच मिळणार नाही, तर विश्वासार्ह बँकिंग आणि पतसेवा क्षेत्रात ‘साईनाथ मल्टीस्टेट’ हा सर्वसामान्यांसाठी एक भक्कम आणि महत्त्वपूर्ण पर्याय म्हणून पुढे येईल, असा विश्वास याप्रसंगी उपस्थित नागरिकांनी आणि मान्यवरांनी व्यक्त केला.
