२२८ कोटींच्या ठेवींचा टप्पा पार करणारी अग्रगण्य संस्था आता सावंतवाडीकरांच्या सेवेत; उद्घाटन प्रसंगी सत्यनारायण महापूजेचे आयोजन
सावंतवाडी, दि.३०: आर्थिक क्षेत्रात आपल्या विश्वासार्ह कामगिरीच्या जोरावर महाराष्ट्र आणि कर्नाटक या दोन्ही राज्यांत आपला स्वतंत्र ठसा उमटवणाऱ्या ‘साईनाथ मल्टीस्टेट को-ऑपरेटिव्ह क्रेडिट सोसायटी लिमिटेड’ची नवीन शाखा आता सावंतवाडी येथे सुरू होत आहे. या नव्या शाखेचा भव्य उद्घाटन सोहळा रविवार, ३१ मे २०२६ रोजी सकाळी १०:३० वाजता अत्यंत उत्साहात संपन्न होणार आहे. सावंतवाडी शहरातील सृष्टी एम्पोरिया, बाजारपेठ, फिश मार्केटजवळ या ठिकाणी ही नवीन शाखा कार्यरत होणार असून, यामुळे परिसरातील नागरिकांना उत्तम आर्थिक सेवा मिळण्यास मदत होणार आहे.
श्री देव उपरलकर, श्री देव पाटेकर आणि श्री विठ्ठल रुक्मिणी यांच्या पावन आशीर्वादाने तसेच सर्व सभासद, ठेवीदार, पिग्मी खातेदार, कर्मचारी, हितचिंतक आणि नागरिकांच्या अतूट विश्वासाच्या बळावर या नवीन शाखेची स्थापना करण्यात आली आहे. या सुवर्णक्षणानिमित्त नूतन शाखेमध्ये श्री सत्यनारायण महापूजेचे तसेच विशेष उद्घाटन सोहळ्याचे आयोजन करण्यात आले आहे. या मंगलप्रसंगी सावंतवाडीतील सर्व सभासद, ग्राहक आणि नागरिकांनी मोठ्या संख्येने उपस्थित राहून पूजनाचा व तीर्थप्रसादाचा लाभ घ्यावा, असे आवाहन संस्थेच्या वतीने करण्यात आले आहे.
संस्थेने आपल्या ग्राहकांच्या आणि सभासदांच्या भक्कम सहकार्याने आजवर तब्बल २२८ कोटी रुपयांच्या ठेवींचा टप्पा यशस्वीपणे पार केला आहे. आता सावंतवाडी शाखेच्या माध्यमातून परिसरातील अधिकाधिक नागरिकांपर्यंत सुरक्षित बँकिंग आणि दर्जेदार आर्थिक सेवा पोहोचविण्याचा मानस संस्थेने व्यक्त केला आहे. आपले ऋणानुबंध अधिक दृढ व्हावेत यासाठी हे आग्रही निमंत्रण असून, संस्थेच्या या पुढील वाटचालीसाठी सर्व नागरिकांनी आपले सहकार्य व शुभेच्छा द्याव्यात, अशी भावना संस्थेचे व्यवस्थापक-अध्यक्ष श्री. उत्तम आनंदा जाधव यांनी व्यक्त केली आहे. या कार्यक्रमाच्या अधिक माहितीसाठी नागरिकांनी ९१६८६६०५७६ या क्रमांकावर संपर्क साधावा.
